نوابشاہ(سٹاف رپورٹر)سابق وزیر خارجہ اورپیپلز پارٹی کے چیئرمین بلاول بھٹو زرداری نے اقتدار میں آنے کے بعد وفاق میں 17بڑی وزارتیں بند کرنے اور یہاں سے ہونیوالی 300ارب روپے کی بچت عوا م پر خرچ کرنے کا اعلان کردیا۔ بختاور گرلز کیڈٹ کالج میں تقریب سے خطاب کرتے ہوئے بلاول بھٹو نے کہا کہ فرٹیلائزر، توانائی اور دیگر سیکٹرز کو دی جانے والی 1500ارب روپے کی سبسڈی مزدوروں اور کسانوں کو براہ راست دیں گے،کسان، مزدور اور نوجوان کارڈ اور غریبوں کو 300یونٹ تک بجلی مفت دیں گے، سولر اور ونڈ پاور منصوبے لگاکر اپنی بجلی خود پیدا کریں گے۔ بلاول کا کہنا تھا آئندہ آنے والی حکومت کو وعدہ کرنا ہوگا کہ 5سال کے اندر تنخواہیں دگنی کرے گی، پرانے سیاستدان پاکستان کا ماضی لیکن آپ مستقبل ہیں۔
