لاہور (وقائع نگا ر) نگران وزیر اعلیٰ پنجاب محسن نقوی کی زیر صدارت امن و امان سے متعلق اہم اجلاس ،صوبے میں عوام کے جان و مال کے تحفظ کیلئے اقدامات کا جائزہ لیا گیا ۔
وزیر اعلیٰ کی سربراہی میں جاری اجلاس میں مذہب کے نام پر شر انگیزی پھیلانے والے عناصر سے آہنی ہاتھوں سے نمٹنے اور ایسے عناصر کی فنانسنگ روکنے کیلئے تمام ضروری اقدامات اٹھانے کا فیصلہ کیا گیا ۔محسن نقوی نے کہا کہ شرپسندوں کے سہولت کاروں کے خلاف بھی گھیرا تنگ کیا جائے گا،قانون شکن عناصر سے کسی قسم کی رعایت نہیں ہو گی ۔
وزیر اعلی محسن نقوی نے شرپسندوں اور جرائم پیشہ گینگز کے خلاف بھرپور کریک ڈاون کا حکم دیتے ہوئے کہا کہ کسی بھی گروہ اور جتھے کو صوبے کا امن تباہ کرنے کی اجازت نہیں دی جائے گی۔ اجلاس میں میانوالی میں کنڈل چیک پوسٹ پر دہشت گردوں کا حملہ ناکام بنانے والے پولیس اہلکاروں کو خراج تحسین پیش کیا گیا ۔انسپکٹر جنرل پولیس نے صوبے میں امن عامہ کی صورتحال اور شرپسندوں کے خلاف قانونی کارروائیوں کے بارے میں بریفنگ دی ۔ صوبائی وزیر اطلاعات عامر میر،چیف سیکرٹری،انسپکٹر جنرل پولیس، ایڈیشنل چیف سیکرٹری، سیکرٹری قانون، ایڈیشنل چیف سیکرٹری داخلہ، ایڈیشنل آئی جی سپیشل برانچ،سی سی پی او، سیکرٹری پراسیکیوشن، ایڈیشنل آئی جی سی ٹی ڈی، قانون نافذ کرنے والے اداروں کے حکام اور اعلی افسران اجلاس میں شریک ہوئے ،پنجاب کے تمام آر پی اوز ویڈیو لنک کے ذریعے اجلاس میں شریک ہوئے۔
یہ بھی پڑھیں : پریکٹس اینڈ پروسیجر ایکٹ کیس کی براہ راست سماعت
