راولپنڈی (وقائع نگار)پاکستان عوامی مسلم لیگ کے سربراہ و سابق وفاقی وزیر داخلہ شیخ رشید احمد کیساتھ گرفتار ہونیوالا انکابھتیجا گھر پہنچ گیا۔
”پاکستان ٹائم “کے مطابق سابق رکن قومی اسمبلی شیخ راشد شفیق نے شیخ شاکر کے گھر واپس پہنچنے کی تصدیق کردی ہے۔جبکہ شیخ رشید کے ملازم اور ڈرائیور کو پہلے ہی رہا کر دیا گیا تھا۔اس سے قبل لاہور ہائیکورٹ راولپنڈی بنچ نے پولیس کو ایک ہفتے میں شیخ رشید کو پیش کرنے کا حکم دے دیا ہے۔جسٹس صداقت علی خان نے عوامی مسلم لیگ کے سربراہ شیخ رشید کی حراست کیخلاف دائر درخواست پر سماعت کی۔عدالت نے آر پی او راولپنڈی سے سوال کیا کہ شیخ رشید اور ان کے ساتھ دیگر دو افراد کہاں ہیں؟ آپ لکھ کر عدالت کو دینگے یا شیخ رشید کو پیش کرینگے؟۔اس پر آر پی او نے عدالت سے مزید 15 دن کا وقت مانگ لیا۔ عدالت نے کہا کہ 15 دن بہت زیادہ ہیں یہ عام معاملہ نہیں، دو دن کی بھی مہلت بہت زیادہ ہو گی۔جسٹس صداقت علی نے کہا کہ وکیل درخواست گزار سردار عبدالرازق کے کہنے پر مزید 7 دن کی مہلت دیتا ہوں۔شیخ رشید ایک ہفتے کے اندر پیش نہ ہوئے تو عدالت ایف آئی آر کا حکم دے گی، بعد ازاں عدالت نے سماعت ایک ہفتے تک ملتوی کر دی۔
