میانوالی پولیس چیک پوسٹ پر حملہ کرنے والے دہشت گردوں کی شناخت ہو گئی،کس دہشت گرد تنظیم سے تعلق اور کہاں کے رہائشی ہیں؟جانئے

میانوالی(کرائم سیل)کنڈل ہائی وے پٹرولنگ پوسٹ پر حملہ کرنے والے اور پولیس فائرنگ میں ہلاک ہونے والے دونوں دہشت گردوں کی شناخت ہوگئی ہے،دونوں کا تعلق کالعدم تحریک طالبان پاکستان(ٹی ٹی پی) کے ٹیپو گروپ سے تھا۔

یہ بھی پڑھیں:کنڈل پٹرولنگ پوسٹ پر حملہ،ایک اہلکار شہید،دو دہشت گرد ہلاک
”پاکستان ٹائم“کے مطابق خاونٹر ٹیررازم ڈیپارٹمنٹ(سی ٹی ڈی)کے حکام کاکہنا ہے کہ میانوالی میں کنڈل پولیس چوکی پر رات گئے دہشت گردوں نے حملہ کیا تھا اور چوکی پر قبضے کی کوشش کی تاہم پولیس کی بھرپور جوابی کارروائی میں دو دہشت گرد ہلاک ہوگئے تھے،جن کی شناخت ہو گئی ہے۔پولیس کی فائرنگ میں ہلاک ہونے والے دہشت گرد زبیر نواز کا تعلق کالعدم ٹی ٹی پی کے ٹیپو گروپ سے تھا،دہشت گرد زبیر نواز لکی مروت میں کالعدم ٹی ٹی پی کے امیر ارشد نوازکا بھائی تھا اور پنجاب میں فرقہ وارانہ قتل عام،بھتہ خوری سمیت سنگین جرائم میں مطلوب تھا۔جوابی کارروائی میں مارے گئے دوسرے دہشت گرد کی شناخت محمد خان کے نام سے ہوئی ہے،جو کالعدم ٹی ٹی پی کے اسی گروپ کا سرگرم رکن تھا۔دہشت گرد محمد خان مارے گئے زبیر نواز سے بھی زیادہ خطرناک تھا۔دونوں دہشت گردوں کی شناخت انٹیلی جنس ایجنسیوں اور جدید سافٹ وئیرز کی مدد سے ہوئی ہے۔

یہ بھی پڑھیں:نواز شریف کی واپسی کا پلان تیار،گرفتاری دیں گے یا نہیں؟اہم تفصیلات آ گئیں