اسلام آباد(سٹاف رپورٹر)ورلڈ کپ 2023 کا سنسنی خیز معرکہ 5 اکتوبر سے شروع ہو رہا ہے،پاکستان کرکٹ ٹیم تاخیر سے ویزے جاری ہونے کے بعد بھارت پہنچ کر پریکٹس سیشن میں مگن ہے تو ایسے میں سوشل میڈیا پر وائرل ایک خبر نے شائقین کو خاصا مشتعل کر دیا ہے،وائرل خبروں کے مطابق پاکستان کے مقبول سوشل میڈیا انفلوئنسرز اور یوٹیوبرز کو تو ویزے دینے سے ہی انکار کر دیا گیا تاہم اب ان خبروں کی حقیقت سامنے آ گئی ہے۔
یہ بھی پڑھیں:قومی کرکٹرز کے نئے سینٹرل کنٹریکٹ کا اعلان
”پاکستان ٹائم“کے مطابق بھارت کی جانب سے پاکستانی یوٹیوبرز اور سوشل میڈیا انفلوئنسرز کے ویزے مسترد کرنے کی خبروں سے پاکستانی صارفین خاصا مشتعل بھی ہوئے۔ان افواہوں میں کہا جارہا ہے کہ پاکستانی یوٹیوبر نادرعلی، مومن ثاقب، سعد الرحمٰن عرف ڈکی بھائی اور خود کو پاکستانی ظاہر کرنے والی متحدہ عرب امارات کی رہائشی بھارتی ٹک ٹاکر المعروف ’لو کہانی‘ کو بھارت نے آئی سی سی ورلڈ کپ کے لیے ویزے جاری نہیں کیے۔ان افواہوں کی تردید کرنے کیلئے یوٹیوبرمومن ثاقب اور سعد الرحمٰن عرف ڈکی بھائی خود میدان میں آگئے۔ڈکی بھائی نے اپنے انسٹا گرام پر ایک سٹوری شئیر کی جس میں انہوں نے کہا کہ کچھ افواہیں گردش کر رہی ہیں کہ میں نے آئی سی سی ورلڈ کپ 2023ء کے لیے بھارتی ویزے کے لیے درخواست دی تھی اور اسے مسترد کر دیا گیا ہے،براہ کرم جان لیں کہ یہ مکمل طور پر جعلی خبریں ہیں،میں نے کسی ویزے کے لیے کبھی درخواست نہیں جمع کروائی،کسی بھی خبر پر یقین کرنے اور پھیلانے سے پہلے ہمیشہ حقائق کی جانچ کریں۔یوٹیوبر نے اسی حوالے سے ایکس پر بھی ایک پوسٹ شئیر کرتے ہوئے افواہوں کی تردید کی۔دوسری جانب یوٹیوبر و اداکار مومن ثاقب نے بھی ایکس پر واضح کیا،خبریں گردش کر رہی ہیں کہ میرا بھارتی ویزا مسترد ہو گیا ہے تو آپ لوگوں کی اطلاع کے لیے عرض ہے کہ میں نے ابھی تک اس کے لیے اپلائی بھی نہیں کیا۔انہوں نے خبر کی تصدیق پر زور دیتے ہوئے لکھا کہ میں اس موقع پر درخواست کروں گا کہ کوئی بھی غلط معلومات پھیلانے سے پہلے حقائق کی جانچ پڑتال اور مستند ذرائع سے خبروں کی تصدیق ضرور کیا کریں،شکریہ۔یوٹیوبر نادر علی اور اماراتی رہائشی المعروف ’لو کہانی‘ نے فی الحال اس حوالے سے کوئی بیان جاری نہیں کیا۔مومن ثاقب نے 2019 کے ورلڈ کپ میں پاکستان کی بھارت سے بدترین شکست کے بعد دلبرداشتہ ہو کر ایک انٹرویو دیا تھا جس میں انہوں نے ’او بھائی مارو مجھے،وقت بدل گیا جذبات بدل گئے‘ جیسے جملے کہے تھے،جو اب ان کی پہچان بن چکے ہیں۔
