قومی کرکٹرز کے نئے سینٹرل کنٹریکٹ کا اعلان

لاہور(سپورٹس رپورٹر)پاکستان کرکٹ بورڈ(پی سی بی) نے قومی کرکٹرز کے نئے سینٹرل کنٹریکٹ کا اعلان کر دیا۔
پی سی بی کے مطابق تین سال کے کنٹریکٹ کے لیے کامیابی کے ساتھ تمام معاملات طے پا گئے،سینٹرل کنٹریکٹ یکم جولائی 2023 سے 30 جون 2026 تک ہوں گے۔ 25 کھلاڑیوں کو سینٹرل کنٹریکٹ پیش کیا گیا ہے،معاہدے میں آئی سی سی ریونیو کا حصہ بھی شامل ہے جبکہ ریڈ بال اور وائٹ بال کے کنٹریکٹس کو اکٹھا کر دیا گیا ہے،اس کا فیصلہ کنٹریکٹ کمیٹی کی تجویز پر کیا گیا ہے۔نئے سینٹرل کنٹریکٹ میں کھلاڑیوں کے معاوضوں میں 127 سے 202 فیصد تک اضافہ کیا گیا ہے۔سینٹرل کنٹریکٹ کی فہرست کو چار کیٹیگریز میں تقسیم کیا گیا ہے۔

یہ بھی پڑھیں:کرکٹ ورلڈکپ ،امپائرز اور ریفریز کی تقرری کا اعلان کر دیا گیا

اے کیٹیگری میں 3 کھلاڑی شامل ہیں جن کے معاوضے میں 202 فیصد اضافہ کیا گیا ہے۔بی کیٹیگری میں 6 کرکٹرز شامل ہیں جن کے معاوضوں میں 144 فیصد اضافہ کیا گیا ہے جبکہ کیٹیگری سی میں 2 کرکٹرز شامل ہیں جن کے معاوضوں میں 135 فیصد اضافہ ہوا ہے۔اس کے علاوہ کیٹیگری ڈی میں 14 کرکٹرز شامل ہیں جن کے معاوضے میں 127 فیصد اضافہ کیا گیا ہے۔سینٹرل کنٹریکٹ سے ڈراپ ہونے والے کرکٹرز میں اظہر علی،فواد عالم،نعمان علی،عابد علی، یاسر شاہ،آصف علی،حیدر علی،خوشدل شاہ،عثمان قادر اور زاہد محمود شامل ہیں اس کے علاوہ گزشتہ سینٹرل کنٹریکٹ میں ایمرجنگ کیٹگری میں شامل سلمان علی آغا اور محمد حارث کی ترقی ملی ہے جبکہ ایمرجنگ کیٹگری کو ختم کر دیا گیا ہے۔کیٹیگری اے میں میں کپتان بابر اعظم،محمد رضوان اور شاہین آفریدی شامل ہیں جبکہ کیٹیگری بی میں فخر زمان،حارث روف،امام الحق،محمد نواز،نسیم شاہ اور شاداب خان کو شامل کیا گیا ہے۔اسی طرح کیٹیگری سی عماد وسیم اور عبداللہ شفیق شامل ہیں اور کیٹیگری ڈی میں فہیم اشرف،حسن علی،افتخار احمد،احسان اللہ، محمد حارث،وسیم جونیئر،صائم ایوب،سرفراز احمد،سلمان آغا،سعود شکیل،شاہنواز داھانی،شان مسعود،اسامہ میر اور زمان خان کو رکھا گیا ہے۔

یہ بھی پڑھیں:لین کا خیال نہ رکھنے پر بابر اعظم کا ’’چالان‘‘ ہو گیا