نئی دہلی (مانیٹرنگ ڈیسک ) بھارتی ریاست منی پور میں جاری خانہ جنگی مودی حکومت کے کنٹرول سے باہرہوگئی، قبائلی تصادم میں 8 افراد ہلاک، 18سے زائد زخمی ہو گئے۔
یہ بھی پڑھیں : یاسین ملک کی زندگی بچانے کیلئے شہزادہ محمد بن سلمان سے مداخلت کی اپیل
غیر ملکی میڈیا کے مطابق خونریز تصادم کے واقعات بشنوپور اور چورا چندپور کے اضلاع میں پیش آئے،جہاں کوکی اور میٹی قبائل کے درمیان تصادم گزشتہ 2 روز سے جاری تھا۔عینی شاہدین کا کہنا ہے کہ اس تمام صورتحال میں پولیس اور فوج خاموش تماشائی بنی رہی جبکہ منی پور کے وزیر اعلی بیرن سنگھ نے حالات کوسنگین اور نازک ترین قرار دیدیا۔ ڈی جی آسام رائفلز لیفٹیننٹ جنرل پردیپ نائر نے بھی ہاتھ کھڑے کر دیے ہیں،لیفٹیننٹ جنرل پردیپ نائر کا کہنا ہے کہ کوکی، میٹی قبائل کے پاس بڑی تعداد میں ہتھیار موجود ہیں،قبائل کے پاس ہتھیاروں کے باعث فورسز کو ناکامی کاسامنا ہے،ماضی میں کبھی ایسی کشیدگی نہیں دیکھی،حالات انتہائی خراب ہیں۔واضح رہے کہ منی پور میں 4 ماہ سے خانہ جنگی جاری ہے جس میں اب تک 300 سے زائد افراد ہلاک ہو چکے ہیں جبکہ 50 ہزار بے گھر ہوئے ہیں۔
