لاہور (سٹاف رپورٹر ) گورنر پنجاب محمد بلیغ الرحمن سے پائنیز بزنس مین گروپ کے عہدیداروں ایگزیکٹو کونسل کے اراکین نے چیئرمین علی حسام اصغر کی سربراہی میں ملاقات کی اور مارکیٹوں، صنعتوں کو درپیش مشکلات و مسائل سے آگاہ کیا۔ اس موقع پر گورنر پنجاب بلیغ الرحمن نے گفتگو کرتے ہوئے کہا کہ کاروبار اور صنعتی ترقی سے ملک میں سماجی اقتصادی ترقی ہوتی ہے، معاشی ترقی سے ملک اور قوم کی خوشحالی وابستہ ہے،معاشی ترقی کے لیے کاروبار کے لیے سازگار ماحول فراہم کرنا بہت اہم ہے، مشکل وقت میں تاجر برادری نے ہمیشہ فلاح و بہبود کے کاموں میں حصہ لیا ہے،کاروباری حضرات سے مستقل بنیادوں پر مل رہا ہوں۔
یہ بھی پڑھیں:وفاقی وزیر صنعت و تجارت گوہر اعجاز نے حیران کن اور نا قابل یقین دعویٰ کر دیا
”پاکستان ٹائم“ کے مطابق لاہور کی بزنس کمیونٹی کے نمائندہ وفد پائنیز بزنس مین گروپ کے اراکین سے گفتگو کرتے ہوئے گورنر پنجاب بلیغ الرحمٰن کا کہنا تھا کہ سابق وزیر اعظم شہباز شریف نے ملک میں کاروبار اور صنعتی ترقی کے لیے سپیشل اکنامک زونز اور مختلف ترقیاتی منصوبوں کے افتتاح سمیت اہم اقدامات اٹھائے،ملک کو ڈیفالٹ سے بچانے کے ساتھ ملک کی معاشی سمت درست کر دی گئی ہے،یہ ملک ایک کشتی کی مانند ہے جس میں ہم سب سوار ہیں،آنے والے دنوں میں ملک میں انشاء اللہ مزید معاشی ترقی اور استحکام آئے گا،ملک ہے تو ہم ہیں،سب کو اس کی ترقی اور استحکام کے لیے مثبت کردار ادا کرنا ہے۔پائنیر بزنس مین گروپ کے چیئرمین علی حسام اصغر اور دیگر عہدیداروں نے گورنر پنجاب کی تاجروں کیلئے اوپن ڈور پالیسی کو سراہا۔
پائنیز بزنس مین گروپ کے چیئرمین علی حسام اصغر کا کہنا تھا کہ موجودہ مشکل حالات میں ملکی و معاشی ترقی اور تاجروں کے مسائل کے حل کیلئے حکومت کے شانہ بشانہ کام کریں گے۔وفد نے گورنر پنجاب کو مارکیٹوں میں پارکنگ پلازوں کی تعمیر،مختلف محکموں واسا،واپڈا،ایل ڈبلیو ایم سی سے متعلقہ مسائل سے آگاہ کیا۔وفد نے گورنر پنجاب کو بجلی کے بلوں پر تاجر برادری اور صنعتی نمائندوں کے تحفظات سے بھی آگاہ کیا ۔گورنر پنجاب نے تاجر برادری کے مسائل اور تحفظات متعلقہ اداروں تک پہنچانے کی یقین دہانی کرائی۔پائنیز بزنس مین گروپ کی جانب سے گورنر پنجاب کو بزنس کمیونٹی کیلئے گراں قدر خدمات پر سوینیئر بھی پیش کی گئی۔وفد میں سابق نائب صدر لاہور چیمبر حارث عتیق مردان علی زیدی،عاصمہ شاہ،ایگزیکٹو کمیٹی ممبران لاہور چیمبر محمد عثمان ملک،یوسف شاہ،عاصم صدیقی،صدر انجمن تاجران لاہور شاہد نذیر۔چودھری،عتیق الرحمن،ابوزر گوہر،حافظ محمد سجاد،خرم لودھی،محمود اسلم،حافظ آفتاب،میاں مقبول اور جنرل سیکرٹری انجمن تاجران خلیل عبیر،سہیل محمود سمیت بڑی تعداد میں مارکیٹوں کے نمائندگان اورصنعتی سیکٹر سے سینئر لیڈرز سید عابد حسین احمد تواب،وقاص اسلم،جہانزیب احمد،کرامت اعوان، مبارک علی،محمد اعجاز،ادیان لون سمیت لاہور کے صنعتی سیکٹر سے نمائندگان کی کثیر تعداد ملاقات میں شامل تھی۔
