راولپنڈی(وقائع نگار)راولپنڈی میں پاکستان تحریک انصاف (پی ٹی آئی) کارکنان کے خلاف ریلی نکالنے پرمقدمہ درج کرلیا گیا۔
یہ بھی پڑھیں : سیکرٹ ایکٹ پر عملدرآمد روکنے کیلئے عدالتی جنگ شروع
”پاکستان ٹائم” کے مطابق راولپنڈی میں ریلی نکالنا تحریک انصاف کے کارکنوں کو مہنگا پڑ گیا ،پولیس نے مقدمہ درج کر لیا ۔تھانہ وارث خان میں درج مقدمے میں طلحہ، راجہ ناصر محفوظ، علی، عرفان، حماد بٹ، فرہاد بٹ، شرجیل عثمان اور عبدالمعیز کو نامزد کیا گیا۔ مقدمے میں آٹھ افراد کو نامزد کرنے کے علاوہ 15 نامعلوم افراد کو شامل کیا گیا۔مقدمے کے متن کے مطابق کارکنوں نے لیاقت باغ سے فیض آباد تک موٹرسائیکل ریلی نکالی اور ہاتھوں میں ڈنڈے اٹھا رکھے تھے۔پولیس کے مطابق ریلی میں ریاست مخالف نعرے بازی کی گئی، کارکنوں نے کار سرکار میں مداخلت اور دفعہ 188 کی خلاف ورزی کی۔دوسری طرف راولپنڈی میں نو مئی کے پر تشدد واقعات میں ملوث مرکزی ملزم یونین کونسل 18 کے چئیرمین سجاد حیدر کو گرفتار کرکے تھانہ نیو ٹاون منتقل کردیا گیا۔ذرائع کے مطابق ملزم 9 مئی کو شمس آباد میں حساس ادارے کے دفتر کے گیٹ پر حملے کے بعد سے روپوش تھا۔تھانہ نیو ٹاؤن پولیس نے سجاد حیدر کو انسداد دہشت گردی کی عدالت میں پیش کیا، عدالت نے سات روزہ جسمانی ریمانڈ منظور کرکے سجاد حیدر کو پولیس کی تحویل میں دے دیا۔ حملے کا مقدمہ تھانہ نیوٹاون میں دہشتگردی ایکٹ کے تحت درج ہے۔
