لندن(سٹاف رپورٹر)پاکستان نے دہشت گردوں کے ساتھ مذاکرات کی دوٹوک انداز میں تردید کردی اور ترجمان دفتر خارجہ ممتاز زہرہ بلوچ نے کہا ہے کہ آئین پاکستان کو نہ ماننے والوں سے کوئی بات نہیں ہوگی، پاکستان کا موقف مذاکرات کی بات کرنے والوں کو پہنچا دیا گیا ہے۔ برطانوی میڈیا کو دیئے گئے انٹرویو میں ترجمان دفتر خارجہ کا کہنا تھا کہ کالعدم تحریک طالبان پاکستان (ٹی ٹی پی) سے مذاکرات کا مشورہ دینے والوں کو بھی یہی مشورہ ہے کہ جن تنظیموں کے ہاتھ پاکستان کے عوام اور پاکستانی سیکیورٹی اہلکاروں کے خون سے رنگے ہوں ان سے مذاکرات کیسے ہوسکتے ہیں؟ بھارتی وزیر دفاع کے بیان پر رد عمل دیتے ہوئے ممتاز زہرہ بلوچ نے کہا کہ یہ بھارتیوں کی خام خیالی ہے کہ کنٹرول لائن عبور کرنے پر انہیں پھولوں کے ہار پہنائیں جائیں گے، پاکستانی قوم جانتی ہے اپنا دفاع کیسے کیا جاتا ہے۔
