لاہور(کرائم سیل)ڈپٹی انسپکٹر جنرل(ڈی آئی جی) شارق جمال خان کی نماز جنازہ ادا کرنے کے بعد میت کو آبائی قبرستان میں سپرد خاک کردیا گیا ۔
”پاکستان ٹائم “ کے مطابق گریڈ 20 کے پولیس افسر ڈی آئی جی شارق جمال خان کی نماز جنازہ اچھرہ میں ادا کر دی گئی،نماز جنازہ میں ڈی آئی جی آپریشنز لاہور سید علی ناصر رضوی، ایڈیشنل آئی جی آپریشنز پنجاب شہزادہ سلطان، ڈی آئی جی لوجسٹک پنجاب اطہر اسماعیل، ڈی آئی جی امین بخاری، چیئرمین لیسکو حافظ میاں محمد نعمان اوران کے رشتہ داروں سمیت دیگر شعبوں سے تعلق رکھنے والے افراد نے شرکت کی ،نماز جنازہ کے بعد ان کی میت آبائی قبرستان میں تدفین کردی گئی۔
یہ بھی پڑھیں:ڈی آئی جی شارق جمال کی پراسرار موت،پوسٹ مارٹم رپورٹ اور ابتدائی تحقیقات نے تہلکہ مچا دیا
واضح رہے پنجاب پولیس کے ڈپٹی انسپکٹر جنرل شارق جمال گزشتہ شب پراسرار طور پر انتقال کر گئے تھے، ان کی لاش فلیٹ نمبر 104 اے تھانہ نشتر کی حدود میں پائی گئی جبکہ وہ ڈیفنس فیز فور میں رہائش پذیر تھے ۔ پولیس ذرائع نے بتایا کہ ڈیفنس اے ڈویژن پولیس نے ایک مرد اور ایک خاتون کو حراست میں لیا، تفتیش کیلئے گھر سے کھانے پینے کی اشیاء اور برتنوں کو بھی قبضے میں لیا گیا ہے، ڈی آئی جی شارق جمال کو ہسپتال لایا گیا تو منہ اور ناک سے خون بہہ رہا تھا ۔پولیس ذرائع نے بتایا ہے کہ قراةالعین نامی ایک لڑکی اور اس کا خاوند فلیٹ پر موجود تھا۔ نشتر کالونی کے علاقے میں فلیٹ کچھ عرصہ قبل شارق جمال نے ہی خریدا تھا۔ بلیٹ کے ایک ملازم کو پولیس نے حراست میں لیا ہے۔ جس نے بتایا ہے کہ مذکورہ خاتون اکثر اپنے خاوند کے ساتھ شارق جمال کو ملنے آتی تھی۔یاد رہے کہ شارق جمال ڈی آئی جی ٹریفک اور ڈی آئی جی ریلوے بھی تعینات رہے جبکہ وہ کچھ عرصہ قبل ہی گریڈ 21 میں ترقی کیلئے کورس کر کے آئے تھے اور ان دنوں آفیسر آن سپیشل ڈیوٹی(او ایس ڈی )تھے۔
