اسلام آباد(وقائع نگار خصوصی)وفاقی وزیرداخلہ رانا ثناء اللہ نے دعویٰ کرتے ہوئے کہا ہے کہ پنجاب میں مسلم لیگ ن کی قومی اسمبلی کی 100 اور صوبائی اسمبلی کی 200 سیٹیں پکی ہیں،چوہدری نثارعلی خان کے پارٹی میں واپس آنے کے کوئی امکانات نہیں،شاہد خاقان عباسی پارٹی میں ہی ہیں،مفتاح اسماعیل سیاست سے کنارہ کش ہیں،پاکستان تحریک انصاف( پی ٹی آئی)کے چیئرمین عمران خان کو سزا الیکشن سے پہلے ہوگی یا بعد میں ہوگی؟معلوم نہیں ہے، طاہر القادری کی طرح چیئرمین پی ٹی آئی بھی القادر ٹرسٹ کے خود مالک بن گئے،ان کے طریقہ واردات کو ہر شخص سمجھتا ہے،دہشت گردی کی کارروائیوں میں افغان سرزمین ملوث ہے۔
یہ بھی پڑھیں:سردار تنویر الیاس کا راولاکوٹ میں پاور شو،تمام تیاریاں اور انتظامات مکمل،کشمیریوں کا جوش و خروش عروج پر،سابق وزیر اعظم کا تہلکہ خیز اعلان متوقع
”پاکستان ٹائم“کے مطابق اسلام آباد میں میڈیا سے غیر رسمی گفتگو کرتے ہوئے وزیر داخلہ رانا ثناء اللہ کا کہنا تھا کہ پاکستان میں ہونے والی دہشت گردی کی کارروائیوں میں افغان سرزمین ملوث ہے،افغان حکومت روکنا نہیں چاہتی یا صلاحیت نہیں رکھتی؟یہ سوال اپنی جگہ موجود ہے،انتہاپسندی کی وجہ سے پاکستان کو ناقابل تلافی نقصان ہوا ہے، انتہا پرست ایجنڈوں کے خلاف عوام میں آگاہی پیدا کرنا ہو گی۔انہوں نے کہا کہ چیئرمین پی ٹی آئی کو سزا یا نااہلی ہوگی اس حوالے سے کچھ بھی کہنا قبل از وقت ہے،سزا الیکشن سے پہلے ہوگی یا بعد میں معلوم نہیں، 190 ملین پاونڈ واپس لینے کے لیے سپریم کورٹ سے رجوع کرنا ہو گا،موجودہ حالات میں امید نہیں کہ ہماری اپیل منظور ہو گی،شیخ رشید کو گرفتار کرکے اسے اہمیت نہیں دینا چاہتے،ایڈیشنل سیشن جج پر جو الزامات لگائے گئے ہیں وہی الزامات سپریم کورٹ اور ہائیکورٹ کے ججز پر بھی ہیں،ججز کے کنڈکٹ کا فیصلہ جوڈیشری نے ہی کرنا ہے۔
رانا ثناء اللہ کا کہنا تھا کہ مردم شماری کو دوبارہ کرانے کے لیے سب کو متفق ہونا ہو گا،پی ڈی ایم تمام سیاسی جماعتیں اپنے اپنے پلیٹ فارم سے الیکشن لڑیں گی،جنرل الیکشن میں کسی سیاسی جماعت کے ساتھ انتخابی اتحاد نہیں کیا جائے گا،پنجاب میں مسلم لیگ ن کی قومی اسمبلی کی 100 اور صوبائی اسمبلی کی 200سیٹیں پکی ہیں،نواز شریف کی واپسی کا باقاعدہ اعلان ہو گا تاہم ابھی تک حتمی تاریخ نہیں ہے۔انہوں نے کہا کہ طاہر القادری نے مختلف ممالک میں اربوں ڈالرز مالیت کی،ٹرسٹ بنائیں،ٹرسٹی صرف طاہر القادری کے گھر کے 6 لوگ ہیں،طاہر القادری کی طرح چیئرمین پی ٹی آئی بھی القادر ٹرسٹ کے خود مالک بن گئے،ان کے طریقہ واردات کو ہر شخص سمجھتا ہے،9 مئی کے واقعات میں جو پی ٹی آئی والے ملوث نہیں ان کے خلاف کارروائی نہیں ہونی چاہیے،عمران ریاض کہاں پر ہے؟اللہ بہتر جانتا ہے،اس کی فیملی نے ہمارے ساتھ رابطہ نہیں کیا،رابطہ کریں گے تو مدد کے لیے تیار ہیں۔
