اسلام آباد(وقائع نگار خصوصی) وفاقی وزیر برائے منصوبہ بندی اور پاکستان مسلم لیگ ن کے سیکرٹری جنرل پروفیسر احسن اقبال نے کہا ہے کہ صبح 10 بجے اٹھنے والی قوم کبھی ترقی نہیں کر سکتی،ہمیں معاشی ایمرجنسی لگا کر اپنی ایکسپورٹ کو بہتر کرنا ہو گا،اگر پاکستانی ٹیکس نہیں دیں گے تو ریاست کو بھیک مانگنا پڑے گی،ہر شہری کا فرض ہے کہ ٹیکس چوری کی نشاندہی کرے۔
”پاکستان ٹائم“ کے مطابق احسن اقبال نے پاکستان اور عالمی مالیاتی ادارے (آئی ایم ایف) کے درمیان ہونے والے معاہدے سے متعلق اظہار خیال کرتے ہوئے کہا کہ آئی ایم ایف معاہدے سے معیشت بہتر ہو گی۔آئی ایم ایف معاہدے سے پاکستان ٹریک پر چڑھ گیا ہے،وزیر اعظم شہباز شریف کی آئی ایم ایف معاہدے کیلئے کوششیں اہم ہیں،آئی ایم ایف معاہدے پر وزیر خزانہ سینیٹر اسحاق ڈار اور ان کی ٹیم مبارکباد کی مستحق ہے۔پاکستان تحریک انصاف(پی ٹی آئی)کو تنقید کا نشانہ بناتے ہوئے احسن اقبال نے کہا کہ آئی ایم ایف معاہدے کے بعد پی ٹی آئی میں صف ماتم بچھی ہوئی ہے،آئی ایم ایف معاہدے کو سبوتاژ کرنے کی کوششیں کیں، پی ٹی آئی نے معاہدے ختم کرنے کیلئے بیرون ملک لابنگ کی،پی ٹی آئی کی نااہلی کی وجہ سے ملکی معیشت دباو کا شکار رہی،پی ٹی آئی ملک دشمن سرگرمیوں میں حد سے گزر چکی ہے،کسی جماعت نے سیاسی مخالفت کو ریاستی مخالفت میں تبدیل نہیں کیا۔وفاقی وزیر احسن اقبال کا کہنا تھا کہ آئی ایم ایف معاہدے سے ہمیں ایک اور موقع ملا ہے،ہمیں معاشی ایمرجنسی لگا کر اپنی ایکسپورٹ کو بہتر کرنا ہو گا،آگے بڑھنے کیلئے ہمیں قومی پلان کی ضرورت ہے،جو تیار کر لیا ہے۔
