جدہ(مانیٹرنگ ڈیسک)سویڈن میں قرآن پاک کی بے حرمتی کے واقعے کیخلاف پوری مسلم امہ میں شدید غم و غصہ پایا جا رہا ہے جبکہ اسلامی تعاون تنظیم(او آئی سی)نے بھی جدہ میں آج(اتوارکو)ہنگامی اجلاس طلب کر لیا ہے جس میں اہم فیصلے متوقع ہیں،دوسری طرف سویڈن نے قرآن پاک کی بے حرمتی کے واقعے کو انفرادی فعل قرار دے کر مسترد کر دیا ہے۔
”پاکستان ٹائم“ کے مطابق سلامی تعاون تنظیم کا ہنگامی اجلاس آج( اتوار) کو جدہ میں منعقد ہوگا۔اسلامی تعاون تنظیم کا اجلاس سعودی عرب نے طلب کیا ہے،اجلاس میں قرآن کی بے حرمتی کے خلاف متحدہ موقف کے اظہار کیلئے اقدامات پر غور کیا جائے گا۔او آئی سی نے متعلقہ حکومتوں پر زور دیا ہے کہ قرآنِ کریم اور دیگر اسلامی اقدار،علامتوں اور مقدسات کی بے حرمتی جیسے گھناونے واقعات کی روک تھام کے لیے موثر اقدامات اٹھائیں۔تنظیم نے تمام ممالک پر عائد ذمہ داری کا اعادہ کیا کہ اقوام متحدہ کے چارٹر کے تحت نسل،جنس،زبان یا مذہب کی تفریق کے بغیر انسانی اور بنیادی حقوق کا احترام اور ان کی پابندی کا فروغ تمام ریاستوں پر فرض ہے۔اسلامی تعاون تنظیم نے اس بات کو یقینی بنانے کی ضرورت پر زور دیا کہ ذمہ داری کے ساتھ اور متعلقہ بین الاقوامی انسانی حقوق کے قوانین کے مطابق آزادی اظہار کے حق کا استعمال کیا جائے۔تنظیم نے عالمی امن اور ہم آہنگی کے لیے مذاہب،ثقافتوں اور تہذیبوں کے درمیان مکالمے،افہام و تفہیم اور تعاون کو فروغ دینے کی اہمیت پر زور دیا۔
واضح رہے کہ سویڈن میں ہونے والے واقعے کے خلاف عالمِ اسلام سراپا احتجاج ہے اور دنیا بھر میں مظاہروں کا سلسلہ جاری ہے،پاکستان سمیت عراق،ایران،سعودی عرب اور مشرق وسطیٰ کے دیگر ممالک نے سویڈن میں قرآن کی بے حرمتی کی مذمت کرتے ہوئے خبردار کیا ہے کہ اس طرح کا عمل دنیا بھر کے مسلمانوں کے جذبات کو ٹھیس پہنچاتا ہے،یورپی یونین نے بھی قرآن کریم کی بے حرمتی کے عمل کو مسترد کرتے ہوئے کہا ہے کہ یہ واقعہ جارحانہ،بے عزتی اور واضح طور پر اشتعال انگیزی پر مبنی ہے،یورپی یونین مذہب یا عقیدے اور اظہار رائے کی آزادی کیلئے کھڑی ہے،نسل پرستی،نفرت انگیزی،عدم برداشت کی یورپ میں کوئی جگہ نہیں، بےحرمتی کا واقعہ ایسے وقت پر کیا گیا جب مسلمان عیدالاضحیٰ منا رہے تھے،وقت آ گیا ہے باہمی افہام و تفہیم اور احترام کیلئے ایک ساتھ کھڑے ہوجائیں،یہ بڑھتے ہوئے تنازعات کو روکنے کا وقت ہے۔
