انقرہ (مانیٹرنگ ڈیسک) ترکیہ نے ملک کے پہلے نیو کلیئر پاور پلانٹ کا افتتاح کر دیا اور دنیا میں جوہری طاقت رکھنے والے ممالک کی صف میں شامل ہو گیا۔
غیر ملکی میڈیا کے مطابق ترکیہ بھی جوہری قوت بن گیا، ترکیہ نے روس کے تعاون سے بنائے گئے ملک کے پہلے نیوکلیئر پاور پلانٹ کا افتتاح کردیا۔جنوبی صوبے مرسین میں روس کے تعاون سے تعمیر ایکیو جوہری پلانٹ کا افتتاح کرتے ہوئے پہلی بار ورچوئل تقریب سے خطاب میں ترک صدر رجب طیب اردوان نے کہا کہ قوم سے کیا گیا ایک اور وعدہ پورا کردیا، ترکیہ ساٹھ سال کی تاخیر کے بعد دنیا میں جوہری طاقت رکھنے والے ممالک کی صف میں شامل ہوگیا ہے، ایکیو پاور پلانٹ نے ہوا اور سمندر کے ذریعے جوہری ایندھن کی ترسیل کےساتھ اب ایک جوہری پلانٹ کادرجہ حاصل کرلیا۔انھوں نے کہا کہ نیوکلیئر پلانٹ کے تین ری ایکٹرز سے تین ہزارچھ سومیگاواٹ بجلی حاصل ہوگی،جو ترکیے کی دس فیصد بجلی کی طلب کو پورا کرے گا۔واضح رہے اکویو جوہری پلانٹ کے لیے ترکی اور روس کے درمیان ایک بین الحکومتی معاہدے پر مئی 2010 میں دستخط کیے گئے تھے اور پلانٹ کے سنگ بنیاد کی تقریب 3 اپریل 2018 کو منعقد ہوئی تھی۔جس کے بعد پہلے یونٹ پر تعمیر شروع ہوئی تھی۔
