نیو جرسی(مانیٹرنگ ڈیسک)مصر کے معروف قاری شیخ عبداللہ کامل نماز کی امامت کراتے ہوئے انتقال کر گئے۔
37 سالہ قاری شیخ عبداللہ نابینا بھی تھے اور بدھ کو امریکا کی ریاست نیو جرسی کی التوحید مسجد میں امامت کرتے ہوئے ان کا انتقال ہو گیا۔عالمی میڈیا کے مطابق مشہور قاری شیخ عبداللہ کامل نے کم عمری میں ہی قرآن پاک حفظ کر لیا تھا اور وہ بہت ہی خوبصورت آواز میں تلاوت کرنے کی وجہ سے معروف تھے۔قاری عبد اللہ کامل قرآن مجید کی دل کو چھو لینے والی تلاوت کے حوالے سے مشہور تھے۔امریکہ روانگی سے کچھ دن قبل قاری عبد اللہ کامل کے ہاں 10 اپریل کو بیٹے کی ولادت ہوئی تھی جس کی اطلاع انہوں نے سوشل میڈیا پر دیتے ہوئے کہا تھا کہ انہوں نے اپنے بیٹے کا نام سفیان رکھا ہے۔قاری عبداللہ نے 2015 میں ایک چینل پر تلاوت قرآن کے ایک مقابلے میں پہلی پوزیشن بھی حاصل کی تھی۔ان کی اچانک موت پر سوشل میڈیا پر اظہار افسوس اور ان کی مغفرت کے لئے دعاوں کا سلسلہ جاری ہے جبکہ عرب دنیا کے مشہور قراء کرام نے مرحوم شیخ عبد اللہ کامل کے انتقال پر اظہار تعزیت کیا ہے۔
