اسلام آباد(وقائع نگار خصوصی)حکومتی اتحادی جماعتوں کا پاکستان تحریک انصاف(پی ٹی آئی)سے رابطہ ہو گیا ِ ملک میں الیکشن کی تاریخ پر اتفاق رائے پیدا کرنے کے لئے حکومتی اتحاد اور پاکستان تحریک انصاف کے رہنماو¿ں کے درمیان عید کے بعد ملاقات متوقع ہے۔
”پاکستان ٹائم“ کے مطابق وفاقی وزیر اور پاکستان پیپلزپارٹی کے سینئر رہنما قمر زمان کائرہ نے نجی ٹی وی کے پروگرام میں گفتگو کرتے ہوئے کہا کہ خان صاحب نے بہت محنت سے ماحول خراب کیا، ہم عدالت کے کہنے سے پہلے ہی معاملے کا حل نکالنے کے لیے کوشاں ہیں، اب اگر عمران خان کا رویہ درست نہ ہوا تو کیا ہوگا، عدالت نے کہا کہ 14 تاریخ کا فیصلہ اپنی جگہ ہے، اسی بات پر بلاول نے کہا کہ ڈائیلاگ گن پوائنٹ پر نہیں ہوتے، بلاول کا کہنا ہے کہ فیصلہ واپس لے کر مذاکرات کرنے دیئے جائیں، مولانا فضل الرحمان مذاکرات کے مخالف نہیں ہیں بلکہ وہ تو عمران خان کے رویے سے نالاں ہیں۔انھوں نے کہا کہ مذاکرات سیاسی قوتوں کا کام ہے انہی کو کرنا چاہئے، پی ٹی آئی رہنما اسد قیصر سے بات چیت ہوئی، سابق سپیکر قومی اسمبلی سے مسلم لیگ ن کے رہنما ایاز صادق کی بات ہوئی، ہم بھی اس ملاقات میں موجود تھے، اسد قیصر نے کہا کہ 26 تاریخ کو ملتے ہیں، بات چیت کے اس عمل میں جے یو آئی کے رہنما نہیں تھے جبکہ ایم کیو ایم کے قائمخانی، مریم اورنگزیب، خواجہ سعد رفیق، فاروق نائیک موجود تھے، سب قائل ہیں کہ ایک دن الیکشن ہونے چاہئے، مجھے 14 مئی کو الیکشن ہوتے نظر نہیں آتے، زور زبردستی کا الیکشن کرایا گیا تو پاکستان کے لیے انتہائی خطرناک ہوگا، سیاسی معاملات عدالتوں میں ہونے سے مسائل پیدا ہوتے ہیں، سیاسی معاملات کو سیاسی فورم پر حل ہونے دیا جائے، سیاسی جماعتوں پر دباو¿ کم کیا جائے، مذاکرات میں نہ زیادہ جلدی اور نہ زیادہ تاخیر ہونی چاہئے۔
