لاہور(کرائم رپورٹر)انسپکٹر جنرل(آئی جی)پنجاب پولیس ڈاکٹرعثمان انور نے کہا ہے کہ کچے میں 23 ہزار 500 ایکڑ علاقہ جمعرات کی شام تک مکمل کلیئر کروالیا گیا،جرائم پیشہ افراد کے تانے بانے علیحدگی پسند اور کالعدم تحریک طالبان پاکستان (ٹی ٹی پی) کے ساتھ بھی ملتے ہیں، دو تین دن پہلے کاونٹر ٹیررازم ڈیپارٹمنٹ( سی ٹی ڈی) نے کارروائی کی، اس دوران جودہشت گرد ہلاک ہوئے وہ خیبرپختونخوا اور پنجاب میں دہشت گرد کارروائیوں میں ملوث تھے۔
“پاکستان ٹائم “ کے مطابق صوبائی وزیراطلاعات عامر میر کے ہمراہ پریس کانفرنس کرتے ہوئے آئی جی پنجاب ڈاکٹر عثمان انور نے کہا کہ عید پر کچے کے علاقے کا دورہ کرنا تھا لیکن جرائم پیشہ افراد نے پولیس پر 3 راکٹ فائر کیے، جس کا پولیس نے جواں مردی سے مقابلہ کیا،راکٹ فائر کیے جانے کے بعد ایک دن قبل ہی کچے کا دورہ کر کے حالات کا جائزہ لیا گیا، 15000 سکوائر کلو میٹر کے علاقے کے اندر بعض علاقوں میں پانی بڑھ جائے تو نو گو ایریا بنتا ہے ورنہ کوئی نو گو ایریا نہیں ہے،کوئی ایک انچ ایسی جگہ نہیں جہاں دشمن کا قبضہ ہو لیکن یہ ضرور ہوتا ہے کہ جرائم پیشہ افراد اپنا ٹھکانا تبدیل کر لیتے ہیں،مختلف مقامات سے فیس بک اور واٹس ایپ کے ذریعے اپنی ویڈیوز اپ لوڈ کرتے ہیں،ہم نے کاونٹر ٹیرر ازم ڈیپارٹمنٹ اور سپیشل برانچ کے ساتھ آئی بی اور دیگر ایجنسیز کی مدد سے جو اطلاعات حاصل کیں ان سے پتا چلا کے جرائم پیشہ افراد کے تانے بانے علیحدگی پسند اور کالعدم ٹی ٹی پی کے ساتھ بھی ملتے ہیں،دو تین دن پہلے سی ٹی ڈی نے کارروائی کی اس دوران دہشت گرد ہلاک ہوئے وہ خیبرپختون خوا اور پنجاب میں دہشت گرد کارروائیوں میں ملوث تھے،پولیس نے پہلے اپنی چوکیاں قائم کیں،ایک طرف رحیم یار خان دوسری طرف راجن پور اور گڈو بیراج تک کے علاقے میں آپریشن جاری ہے، 23 ہزار 500 ایکڑ علاقہ جمعرات کی شام تک مکمل کلیئر کروا لیا جبکہ 12 ہزار سکوائر کلو میٹر کا علاقہ چند دن میں کلیئر کروائیں گے،جس کے لئے مزید 11 ہزار 500 کی نفری درکار ہے،ایک اور دہشت گرد قابل سکھانی سے مقابلہ متوقع ہے،اس جگہ سے 14 افراد کو گرفتار کیا اور تین ہلاک ہوئے،کلیئر کیے گئے علاقے میں جلد صحافی برادری کا دورہ کروایا جائے گا۔
انھوں نے کہا کہ اگر الیکشن کمیشن نے اجازت دی تو کچے کے علاقے میں ترقیاتی کام کروائیں گے، سڑکیں بنائیں گے تاکہ ڈاکو پانی آنے کے بعد کچے کے علاقے کا فائدہ نہ اٹھا سکیں،پختہ سڑکیں بنانے کا ارادہ ہے،دہشت گرد علیحدگی پسند جرائم پیشہ افراد اور اغواء برائے تاوان کرنے والے یہ اب وہاں ٹھکانے نہیں بنا سکتے،پچھلے کچھ دن سے اغوا برائے تاوان کی کوئی واردات نہیں ہوئی،ہتھیار ڈالنے والوں سے رعایت برتی جائے گی۔اس موقع پر صوبائی وزیر اطلاعات عامر میر نے عید الفطر پر زمان پارک آپریشن کی قیاس آرائیوں کی تردید کرتے ہوئے کچہ میں جاری آپریشن کو حکومت کی ترجیح قرار دیا اور کلئیر ہونے والے علاقوں میں بنیادی سہولیات کی فراہمی کی خبر سناتے ہوئے کہا کہ کچے کے علاقوں میں وزیر اعلیٰ نے سکول،ڈسپنسری کے قیام کی منظوری دیدی ہے،وزیر اعلیٰ پنجاب کی جانب سے تمام سروسز پر منظوری دیدی گئی ہے،اگلہ مرحلہ الیکشن کمیشن سے منظوری کا ہے جس کے بعد باقاعدہ کام شروع کر دیا جائے گا۔
