لاہور(کرائم رپورٹر)سابق وزیراعلیٰ پنجاب کے صاحبزادے اور پاکستان تحریک انصاف(پی ٹی آئی)کے رہنما چوہدری مونس الٰہی کے قریبی ترین دوست زبیر خان کو اینٹی کرپشن پنجاب نے گرفتار کر لیا۔
”پاکستان ٹائم“ کے مطابق تحریک انصاف کے رہنما مونس الٰہی کے قریبی دوست زبیر خان کو اینٹی کرپشن پنجاب نے کروڑوں روپے کی کرپشن کے الزام میں گرفتار کر لیا ہے۔گزشتہ روز اینٹی کرپشن پنجاب نے اربوں روپے کی کرپشن کے الزام میں پرویز الٰہی،مونس الٰہی،محمد خان بھٹی اور زبیر خان کے خلاف مقدمہ درج کیا تھا۔ترجمان اینٹی کرپشن نے بتایا کہ سابق وزیر اعلیٰ پنجاب کے خلاف مقدمہ ٹھوس شواہد کی بنا پر درج کیا گیا ہے،پرویز الٰہی اینڈ کمپنی نے لاہور ویسٹ مینجمنٹ کمپنی کے ذریعے ایک غیر ملکی کمپنی کی واجب الادا رقم 2 ارب 90 کروڑ کی ادائیگی کے عوض ساڑھے 12 کروڑ روپے رشوت وصول کی۔ترجمان نے مزید کہا کہ پرویز الٰہی،مونس الٰہی اور محمد خان بھٹی کی ڈیل مونس الٰہی کے دوست زبیر خان نے کروائی،غیر ملکی کمپنی کی واجب الادارقم کے عوض پرویز الٰہی نے ساڑھے 6 کروڑ روپے وصول کیے،مونس الٰہی اور محمد خان بھٹی نے 5 کروڑ جب کہ زبیر خان نے 50 لاکھ روپے لئے۔ترجمان اینٹی کرپشن کے مطابق ملزمان پرویز الہٰی،مونس الٰہی،محمد خان بھٹی اور زبیر خان نے اختیارات کا ناجائز استعمال کرتے ہوئے لاہور ویسٹ مینجمنٹ کمپنی پر دباو ڈال کر 2 ارب 90 کروڑ روپے کی فوری ادائیگی کروائی۔
