لاہور (سٹاف رپورٹر ) پاکستان تحریک انصاف کے مرکزی رہنما اور سابق وفاقی وزیر فواد چودھری نے کہا ہے کہ اگر الیکشن نہ ہوئے تو سپریم کورٹ کا بطور ادارہ وجود خطرے میں پڑ جائے گا ، ایم کیو ایم نے کراچی کے عوام کی نمائندگی مزید کم کرنے میں گھنانا کردار ادا کیا ہے۔
”پاکستان ٹائم“ کے مطابق مائیکرو بلاگنگ ویب سائٹ پر ٹویٹ کرتے ہوئے فواد چوہدری کا کہنا تھا کہ سپریم کورٹ کی تین ہدایات تھیں، وفاقی حکومت 21 ارب روپے دے گی اور اس کے ساتھ عملدرآمد کا طریقہ کار بھی دیا گیا تھا، چیف سیکرٹری اور آئی جی پنجاب سکیورٹی پلان دیں گے، جب کہ سیکرٹری دفاع فورسز کی فراہمی یقینی بنائیں گے، اب سپریم کورٹ نے افسران کو براہ راست طلب کیا اور حقائق مانگے ہیں، سپریم کورٹ کے حکم پر عملدرآمد ہونا لازمی ہے، اگر الیکشن نہیں ہوتے تو سپریم کورٹ کا بطور ادارہ وجود خطرے میں پڑ جاتا ہے، لہٰذا تمام ادارے اور سربراہان جو آئین کے تحفظ کا حلف اٹھاتے ہیں ان کو مثبت کردار ادا کرنا ہو گا۔ فواد چودھری نے کہا کہ 95 فیصد مردم شماری مکمل ہونے کے بعد 45 ارب روپے لگ گئے، سندھ اور خصوصا کراچی کی آبادی میں نمایاں کمی دکھادی گئی ہے، اس کے نتیجے میں کراچی دو قومی نشستوں سے محروم ہوسکتا ہے، کراچی کے لوگ ان جماعتوں کا احتساب کریں گے۔
