لندن(نمائندہ خصوصی)پاکستان مسلم لیگ ن کے قائداورسابق وزیر اعظم میاں نواز شریف نے چیف جسٹس سپریم کورٹ آف پاکستان جسٹس عمر عطاء بندیال پر سنگین ترین الزام عائد کرتے ہوئے کہا ہے کہ وہ پاکستان تحریک انصاف( پی ٹی آئی) کے ایجنڈے کو آگے بڑھا رہے ہیں۔
”پاکستان ٹائم “ کے مطابق مائیکرو بلاگنگ ویب سائٹ پر اپنی ایک ٹویٹ میں میاں نواز شریف نے کہا کہ عدالتیں قوموں کو بحرانوں سے نکالتی ہیں نہ کہ بحرانوں میں دھکیلتی ہیں،چیف جسٹس نے نہ جانے کون سا اختیار استعمال کر کے اکثریتی فیصلے پر اقلیتی رائے مسلط کردی۔میاں نواز شریف نے چیف جسٹس سے مستعفی ہونے کا مطالبہ کرتے ہوئے لکھا کہ اپنے منصب اور آئین کی توہین کرتے ہوئے پی ٹی آئی کے ایجنڈے کو آگے بڑھانے والا چیف جسٹس مزید تباہی کرنے کے بجائے فی الفور مستعفی ہوجائے۔
دوسری جانب مسلم لیگ ن کی چیف آرگنائزر مریم نواز نے بھی چیف جسٹس پاکستان سے استعفے کا مطالبہ کردیا ہے۔ایک ٹویٹ میں مریم نواز نے لکھا کہ چیف جسٹس عمر عطاءبندیال نے عمران خان اور پی ٹی آئی کی حمایت کے لئے آئین و قانون کی کھلم کھلا خلاف ورزی کی، اختیارات کے ذغلط استعمال نے سپریم کورٹ میں بغاوت جیسی غیر معمولی صورتحال کو جنم دیا جب کہ نامور ججز نے چیف جسٹس کے طرز عمل اور تعصب پر سنگین سوالات اٹھائے ہیں۔مریم نواز کا کہنا تھا کہ آج تک کسی چیف جسٹس پر اس قسم کے مِس کنڈکٹ کے الزامات نہیں لگے، چیف جسٹس کا پی ٹی آئی کی جانب نمایاں جھکاو¿ نمایاں ہے، لہٰذا چیف جسٹس عمر عطاءبندیال کو استعفیٰ دینا چاہیے۔
عدالتیں قوموں کو بحرانوں سے نکالتی نہ کہ بحرانوں میں دھکیلتی ہیں۔چیف جسٹس نے نہ جانے کونسا اختیار استعمال کر کے اکثریتی فیصلے پر اقلیتی رائے مسلط کردی۔اپنے منصب اور آئین کی توہین کرتے ہوئے PTI کے ایجنڈے کو آگے بڑھانے والا چیف جسٹس مزید تباہی کرنے کے بجائے فی الفور مستعفی ہو جائے۔
— Nawaz Sharif (@NawazSharifMNS) April 7, 2023
