ٹوکیو(کامرس رپورٹر) مشہور جاپانی تجارتی کمپنی نے اپنے آئرش پارٹنر کے ساتھ مل کر پاکستان کو روسی تیل اور نائیجرین لکویفائیڈ نیچرل گیس (ایل این جی) عالمی مارکیٹ سے 35 فیصد کم قیمت پر فروخت کرنے کی پیشکش کی ہے۔
”پاکستان ٹائم“ کے مطابق جاپانی کمپنی کے نمائندے نے پاکستانی سفیر کو ٹوکیو میں ملاقات کے دوران پیشکش کرتے ہوئے کہا ہے کہ ان کی کمپنی پاکستان کو روسی تیل اور نائیجرین لکویفائیڈ نیچرل گیس (ایل این جی)عالمی مارکیٹ سے 35 فیصد کم قیمت پر فروخت کرنے کے لئے تیار ہے۔پاک جاپان بزنس کونسل کے صدر اور جاپان میں مقیم پاکستانی تاجر رانا عابد حسین نے اس میٹنگ کی میزبانی کی۔جاپانی نمائندے نے پاکستانی سفیر کو تیل اور ایل این جی پر بریفنگ دی۔جاپانی کمپنی کے نمائندے نے دعویٰ کیا کہ ان کی فرم اور پارٹنر کمپنی کو روسی تیل اور نائجیرین ایل این جی فروخت کرنے کی اجازت ہے۔جاپانی نمائندے نے کہا کہ اگر پاکستان تیل اور گیس خریدنے پر آمادہ ہو تو وہ دونوں مصنوعات عالمی مارکیٹ سے 35 فیصد ڈسکاونٹ پر فروخت کر سکتے ہیں۔اس موقع پر پاکستانی سفیر رضا بشیر تارڑ نے کہا کہ پاکستان اس پیشکش پر غور کرے گا،متعلقہ وزارت کو آگاہ کرے گا اور جاپانی کمپنی کو مطلع کرے گا۔اجلاس میں پاک جاپان بزنس کونسل کے صدر رانا عابد حسین نے بھی کہا کہ پاکستان اس وقت شدید معاشی بحران کا شکار ہے اور تیل اور گیس کی درآمدات پر بھاری رقم خرچ کرنے پر مجبور ہے،اگر عالمی قوانین اجازت دیں تو پاکستان کو سستے تیل اور گیس کی خریداری میں کوئی پریشانی نہیں ہونی چاہئے۔
