لاہور(وقائع نگار خصوصی)پاکستان تحریک انصاف(پی ٹی آئی)کے مرکزی رہنماوں سابق وفاقی وزراء اسد عمر اور فواد چوہدری تحریک انصاف کے سوشل میڈیا انچارج اظہر مشوانی کے ”جبری اغوا “ہونے پر پھٹ پڑے،وفاقی حکومت اور وزیر داخلہ رانا ثناء اللہ کو کڑی تنقید کا نشانہ بناتے ہوئے کہا ہے کہ اظہر مشوانی کولاپتا ہوئے 3 دن ہوگئے،موجودہ حکومت نے تمام حدیں پارکردی ہیں،پاکستان کے عوام کی بے عزتی برداشت نہیں کی جاسکتی،یہ لوگ حکومت چلارہے ہیں یا کوئی گینگ؟راناثنا ء اللہ کہتا ہے کہ عمران خان نہیں یا ہم نہیں،حکمرانوں نے ملک کو تماشا بناکر رکھ دیا ہے حالانکہ سیاست ایک دوسرے کے نقطہ نظر کو سمجھنے کا نام ہے،حکمران ملک میں جلد ازجلد انتخابات کروائیں کیونکہ موجودہ حالات میں آئین پر عمل کے سوا کوئی راستہ نہیں،آنے والا ہفتہ ملکی تاریخ کیلئے اہم ترین ثابت ہوگا۔
”پاکستان ٹائم“ کے مطابق لاہور میں پی ٹی آئی کے لاپتا کارکن اظہر مشوانی کے بھائی کے ہمراہ فواد چوہدری، اسد عمر سمیت دیگر رہنماو¿ں نے پریس کانفرنس کی۔ اس دوران حکومت کو نشانے پر رکھتے ہوئے فواد چوہدری نے کہا کہ ہمارے کارکنان کو لاپتا اور خواتین کو بے عزت کیا جارہا ہے، ماضی میں کبھی ایسا بہیمانہ سلوک نہیں کیا گیا، گھروں سے 10 اور 13 سال کے بچوں کو بھی اٹھایا جارہا ہے، ایک کارکن کے 80 سالہ والد کو بھی اٹھا لیا گیا۔انہوں نے کہا کہ دنیا میں پٹرول سستا اور پاکستان میں مہنگا ہورہا ہے جبکہ 72گھنٹے میں آٹے کے حصول کے دوران 6 افراد جاں بحق ہوچکے، لاہور میں مینار پاکستان جلسے میں شرکت کرکے عوام نے حکمرانوں کو مسترد کردیا، پورا پاکستان اس وقت عمران خان کے ساتھ کھڑا ہے، جلسے کے موقع پر لاہور کو کنٹینر لگا کر بلاک کیا گیا اور جب عمران خان پیشی پر گئے تو گھر پر حملہ کیا گیا، ہم نے پولیس حکام کو بھی ایف آئی آر میں نامزد کیا ہے۔ فواد چوہدری نے صدر مملکت ڈاکٹر عارف علوی کے خط پر وزیراعظم کے جوابی خط کو ہدف تنقید بناتے ہوئے کہا کہ شہبازشریف نے صدرمملکت کے خط کا جواب دیا، خط سے وزیراعظم شہبازشریف کے قد کا اندازہ لگایا جاسکتا ہے۔ سابق وزیر خزانہ اسد عمر نے بھی حکومت کو آڑہے ہاتھوں لیتے ہوئے کہا کہ پاکستان اس وقت فیصلہ کن موڑ پر ہے، آنے والا ہفتہ ملکی تاریخ کیلئے اہم ترین ثابت ہوگا، عمران خان حکمرانوں کے عصاب پر سوار ہیں، حکمراں شکست کے خوف سے انتخابات نہیں کروا رہے، حکمران ایک سال میں آئی ایم ایف سے معاہدہ نہیں کرسکے، حکمرانوں نے انٹرنیشنل مانیٹری فنڈ سے معاہدہ کیے بغیر ہی مہنگائی بڑھا دی ہے۔
پریس کانفرنس میں پی ٹی آئی رہنما اظہر مشوانی کے بھائی نے کہا کہ اظہر نے اگر کوئی قانون توڑا تو بتایا جائے، اظہر کو کہاں رکھا گیا؟ ابھی تک کچھ پتہ نہیں چل سکا، اظہر مشوانی ساڑھے پانچ بجے گاڑی لیکر زمان پارک کی طرف نکلا، افطاری کے وقت کالز کی لیکن اسکا نمبر نہیں ملا، رابطہ نہ ہونے پر اظہر کو ڈھونڈنا شروع کیا لیکن کوئی سراغ نہیں ملا، تھانہ گرین ٹاو¿ن میں گمشدگی کی درخواست دی، تھانے والوں نے کہا کہ درخواست سے پی ٹی آئی کا لفظ نکال لیں، آپ کی دخواست پھر لیں گے ہمیں اوپر سے حکم ہے، پھر ہفتہ کی رات کو ایف آئی آر کاٹی گئی۔
