لاہور(سٹاف رپورٹر )پاکستان نے ایشین کرکٹ کونسل (اے سی سی) کو واضح کردیا ہے کہ اگر ایشیا کپ کی میزبانی سے محروم کردیا گیا تو رواں برس ہونے والے ٹورنامنٹ میں شرکت نہیں کریں گے۔
”پاکستان ٹائم “کے مطابق پاکستان رواں برس کے ایشیا کپ میں حصہ نہیں لے گا اگر بھارت کے خدشات کی بنیاد پر اس سے ٹورنامنٹ کی میزبانی سے محروم کردیا جاتا ہے،رواں ہفتے ایشین کرکٹ کونسل کا اجلاس ہوا جہاں ایشیا کپ میں بھارت کی آمد کے حوالے سے کونسل اور پاکستان کرکٹ بورڈ (پی سی بی) کے درمیان ڈیڈلاک برقرار رہا۔
اے سی سی نے دونوں ملکوں کے خدشات کے پیش نظر ٹورنامنٹ کے انعقاد کے لیے ایک ’ہائبرڈ ماڈل‘ کی تجویز دی تھی، جس کے تحت بھارت اپنے میچز دوسرے مقام پر کھیلے گا، اس صورت میں یہ طے ہے کہ پی سی بی کو ایشیا کپ کی میزبان کی حیثیت سے زیادہ سے زیادہ منافع ملے گا جس طرح بھارت کے علاوہ دیگر تمام میچز پاکستان کے اندر کھیلے جائیں گے اور زیادہ سے زیادہ میچز ملک کے اندر ہوں گے، پی سی بی نے اس ہائبرڈ ماڈل سے اتفاق نہیں کیا اور خدشہ ہے کہ پاکستان ایشیا کپ سے دستبردار ہوجائے۔
رپورٹ کے مطابق اطلاعات ہیں کہ نجم سیٹھی نے اسی طرح کا ہائبر ماڈل آئی سی سی کرکٹ ورلڈ کپ کے لیے تجویز کرنے کا مطالبہ بھی کردیا ہے کیونکہ ورلڈ کپ میں شرکت کے لیے پاکستان کو بھارت جانا ہوگا۔بھارت میں ایک روزہ کرکٹ ورلڈ کپ اکتوبر اور نومبر کے دوران کھیلا جائے گا۔
