شارجہ (سٹاف رپورٹر) نوجوان کرکٹرز پر مشتمل پاکستان کرکٹ ٹیم کے کپتان شاداب خان کا کہنا ہے کہ افغانستان کے خلاف پہلے ٹی 20 میچ میں بہترین کھیل کا مظاہرہ نہیں کر سکے، نوجوان کھلاڑی پریشر ہینڈل نہیں کر سکے ۔
”پاکستان ٹائم “کے مطابق شارجہ میں جاری تین ٹی 20 میچز پر مشتمل سیریز کے پہلے میچ میں افغانستان نے پاکستان کو 6 وکٹوں سے شکست دے دی ہے، میچ کے بعد میڈیا سے گفتگو کرتے ہوئے کپتان شاداب خان نے کہا کہ ہماری ٹیم نوجوان کھلاڑیوں پر مشتمل تھی، پریشر میں آکر نروس ہوگئے جس کی وجہ سے پرفارم کرنے میں ناکام رہے، حکمت عملی کے لحاظ سے ہم بلکل ٹھیک تھے البتہ ہار تسلیم کرتے ہیں اور اگلے میچ میں بہتر کارکردگی کا مظاہرہ کریں گے، احسان اللہ، زمان خان اور عماد وسیم کی واپسی مثبت رہی۔
دوسری جانب افغانستان کرکٹ ٹیم کے کپتان راشد خان کا کہنا تھا کہ اس پچ پر 120 رنز ہوتے تو جیت مشکل ہوجاتی، ہمیشہ پاکستان کے خلاف جیت کے قریب پہنچ کر ہار جاتے تھے مگر اس بار فتح مل گئی۔
