نئی دہلی(مانیٹرنگ ڈیسک) بھارتی ریاست ارونا چل میں چین کی سرحد کے نزدیک بھارتی فوج کا ”چیتا “ہیلی کاپٹر گر کر تباہ ہوگیا ہے ، جس میں ہلاکتوں کا خدشہ ظاہر کیا گیا ہے ۔
”پاکستان ٹائم “نے بھارتی میڈیا کے حوالے سے بتایا کہ اروناچل کے مندالا پہاڑی سلسلے میں بھارتی فوج کا ہیلی کاپٹر گر کر تباہ ہو گیا، ہیلی کاپٹر جس علاقے میں تباہ ہوا وہ چین کی سرحد کے نزدیک ہے، ہیلی کاپٹر نے ارونا چل کے آرمی بیس سے پرواز بھری تھی لیکن کچھ ہی دیر بعد کنٹرول ٹاور سے رابطہ منقطع ہوگیا تھا، ہیلی کاپٹر کے پہاڑی سلسلے میں گر کر تباہ ہونے کی تصدیق ہوگئی۔
ریسکیو ٹیمیں جائے وقوعہ کی جانب روانہ ہو چکی ہیں،ابھی یہ واضح نہیں کہ ہیلی کاپٹر میں کتنے افراد سوار تھے ، بھارتی فوج کی جانب سے تاحال کوئی بیان سامنے نہیں آیا،واضح رہے کہ اسی ریاست میں گزشتہ 10 برسوں میں بھارتی فوج کے 7 سے زائد ہیلی کاپٹر حادثوں میں سابق وزیر اعلیٰ سمیت 40 اہلکار اور افسران ہلاک ہو چکے ہیں۔
