گوجرانوالہ (سٹاف رپورٹر ) پاکستان مسلم لیگ (ن)کی سینئر نائب صدر اور چیف آرگنائزر مریم نواز کا کہنا ہے کہ سازشیوں کی سازش ہے کہ معیشت نہ سنبھلے، جب بھی مشکل وقت پڑا نواز شریف اور شہباز شریف کو آگے آنا پڑا۔
”پاکستان ٹائم “کے مطابق گوجرانوالہ میں مریم نواز کی زیر صدارت مسلم لیگ ن کی گوجرانوالہ ڈویژن کی مرکزی تنظیم کا اجلاس ہوا، تقریب سے خطاب کرتے ہوئے مریم نواز کا کہنا تھا کہ ہمیشہ کی طرح شیر ہی قوم کو مسائل اور انہیں پیدا کرنے والے گیدڑوں سے نجات دلائے گا،
کارکنان کو مخاطب کرتے ہوئے کہا کہ آپ کی شناخت اور جماعت کو مٹانے والے اللہ کے کرم سے خود مٹ گئے، الحمداللہ، ہماری قیادت ایمان دار، نیک نام اور عوام کی کارکردگی کے امتحان میں سرخرو ہوئی۔
مریم نواز کا مزید کہنا تھا کہ مشکل معاشی حالات میں ڈوبا ملک پہلی بار ہمیں نہیں ملا، ملک مسائل میں جب ڈوب جاتا ہے، تب ہی نواز شریف اور شہباز شریف کو آنا پڑتا ہے، الزام لگانے والے آج منہ چھپاتے پھرتے ہیں، پتلی تماشا کرنے والے گھروں میں قید ہوچکے ہیں۔
سابق وزیر اعظم کی بیٹی کا کہنا تھا کہ آج مشکل ضرور ہے لیکن اللہ تعالیٰ کی مدد سے لوڈ شیڈنگ کے اندھیروں کی طرح معاشی اندھیرے بھی ختم ہوں گے، سازشیوں کی سازش ہے کہ معیشت نہ سنبھلے، ہمیشہ کی طرح شیر ہی قوم کو مسائل اور انہیں پیدا کرنے والے گیدڑوں سے نجات دلائے گا۔انہوں نے مزید کہا کہ عمران داری کا ٹرک ڈرائیوروں سمیت پکڑا جا چکا ہے۔
