لاہور(کورٹ رپورٹر) لاہور ہائیکورٹ نے اکبر چوک فلائی اوور کا کام تاحکم ثانی روکتے ہوئے سرکاری حکام کو درخت کاٹنے پرمقدمات درج اور توہین عدالت کی کارروائی کی تنبیہ دے دی جبکہ مشینری کی خریداری کے لئے بجٹ روکنے پرچیف سیکرٹری،چیئرمین پی اینڈڈی کیخلاف توہین عدالت کی کارروائی کا عندیہ دیدیا۔
”پاکستان ٹائم “ کے مطابق جسٹس شاہد کریم نے انسداد سموگ سے متعلق ہارون فاروق سمیت دیگر کی درخواستوں کی سماعت کی، وفاقی حکومت کی جانب سے ڈپٹی اٹارنی جنرل اسد علی باجوہ سمیت دیگرپیش ہوئے،ممبران ماحولیاتی کمیشن حناحفیظ اللہ اسحاق اورکمال حیدر نےرپورٹ پیش کی۔جسٹس شاہد کریم نے ریمارکس دیے پہلے منصوبے مکمل کیے بغیر نئے منصوبے ٹریفک کی روانی متاثر کرتے ہیں، کیا ایل ڈی اے چاہتی ہے کہ شہری ٹریفک جام میں گاڑیوں میں مرجائیں،جب تک جاری منصوبے مکمل نہیں ہوتے یا ماحولیاتی آلودگی سے متعلق عدالت کومطمئن نہیں کیا جاتا، نیامنصوبہ شروع نہ کیاجائے۔ماحولیاتی کمیشن اور ٹریفک پولیس کے نمائندے نے پی ایس ایل میچزسے متعلق اقدامات کے حوالے سے عدالت کو آگاہ کیا۔فاضل جج نے میچزکیلئے اخراجات کی تفصیلات طلب کرتے ہوئے کہاچیف سیکرٹری سے میٹنگ کرکے بتائیں فنڈز کہاں سے آرہے ہیں؟یہ بھی بتایاجائے کہ میچزکیلئے فنڈزمیں پی سی بھی کاکتناحصہ ہے؟۔فاضل جج نے فصلوں کی باقیات سے متعلق جدید مشینری کی خریداری کیلئے بجٹ روکنے پرریمارکس دیے کہ، چیف سیکرٹری،چئیرمین پی این ڈی کے رویے سے لگتاہے کہ اب ان کیخلاف توہین عدالت کی کارروائی کرنی پڑیگی۔عدالت نے چیف سیکرٹری،چیئرمین پی این ڈی سے آئندہ سماعت پر وضاحت طلب کرلی کہ انہوں نے بجٹ کیوں روکا؟۔عدالت نے لسیکوکوبھی درخت کاٹنے سے روک دیا۔جسٹس شاہد کریم نے ریمارکس دیے سموگ زندگیوں کیلئے انتہائی خطر ناک ہے۔عدالت نے عدالتی احکامات کے متعلق عملدرآمد رپورٹ طلب کرتے ہوئے کیس کی مزید سماعت 7 مارچ تک ملتوی کردی۔
