راولپنڈی(سٹاف رپورٹر)عوامی مسلم لیگ کے سربراہ اور سابق وزیر داخلہ شیخ رشید احمد نے دعویٰ کرتے ہوئے کہا ہے کہ رات کی تاریکی میں سپریم کورٹ پر حملے کی سازشیں تیار ہو رہی ہیں،مریم کے بعد بلاول نے بھی عدلیہ کو آنکھیں دکھانا شروع کردی ہیں۔
”پاکستان ٹائم “ کے مطابق مائیکرو بلاگنگ ویب سائٹ پر ٹویٹ کرتے ہوئے عوامی مسلم لیگ کے سربراہ اور سابق وفاقی وزیر شیخ رشید کا کہنا تھا کہ عدلیہ پر حملوں کی وراثت ”گینگز آف فائیو “نے اگلی نسل میں منتقل کردی ہے، مریم کے بعد بلاول نے بھی عدلیہ کو آنکھیں دکھانا شروع کردی ہیں، رات کی تاریکی میں سپریم کورٹ پر حملے کی سازشیں تیار ہو رہی ہیں، یہ سپریم کورٹ میں 1997 کا ماحول پیدا کرنا چاہتے ہیں، ملک انارکی اورسول نافرمانی کی طرف جا رہا ہے، منی لانڈر کے کنگ کا بیٹا بلاول اپنے نیب کے قانون ختم اور ججز پر لاگو کرنا چاہتا ہے۔سابق وفاقی وزیر داخلہ نے کہا کہ جمہوریت کو بچانے کا ایک ہی راستہ ہے جو سپریم کورٹ سے نکلے گا، ثبوت بھی نکلیں گے اور نیب زدہ لوگوں کے تابوت بھی نکلیں گے، اورسیز پاکستانیوں کو ووٹ کا حق بھی ملے گا، سیاسی خواہشات پر بینچ تشکیل نہیں پاتے، سپریم کورٹ نے صرف الیکشن کی تاریخ دینی ہے، فیصلہ عوام نے کرنا ہے۔شیخ رشید کا مزید کہنا تھا کہ بجٹ خسارہ62کھرب تک پہنچ گیا ہے، عالمی مالیاتی ادارے (آئی ایم ایف) کی بڑی جیل نے غریب کو ڈیتھ زون میں داخل کر دیا ہے، ساری قوم کی نظریں سپریم کورٹ پرلگی ہیں اورساری قوم سپریم کورٹ کے ساتھ کھڑی ہے، تمام صورتحال سے نکلنے کا واحد راستہ الیکشن ہی ہے جس سے پاکستان ڈیمو کریٹک موومنٹ (پی ڈی ایم) فراری ہے،راجن پور میں پاکستان تحریک انصاف( پی ٹی آئی) کی جیت سے پی ڈی ایم الیکشن سے مکمل بھاگ گئی ہے۔
