پی ٹی آئی ممنوعہ فنڈنگ کیس ،عمران خان کو آج ہی عدالت پیش ہونے کا حکم

اسلام آباد(کورٹ رپورٹر) پی ٹی آئی ممنوعہ فنڈنگ کیس میں بینکنگ عدالت نے چیئرمین پاکستان تحریک انصاف اور سابق وزیر اعظم عمران خان کو آج ہی عدالت میں پیش ہونے کا حکم دیتے ہوئے استثنیٰ کی درخواست خارج کردی ہے ۔
” پاکستان ٹائم “کے مطابق بینکنگ کورٹ کی جج رخشندہ شاہین نے ممنوعہ فنڈنگ کیس میں فارن ایکسچینج ایکٹ کے تحت درج مقدمے میں عمران خان و دیگر ملزمان کی عبوری ضمانت کی درخواست پر سماعت کی، اس موقع پر عمران خان کے وکیل سلمان صفدر، پی ٹی آئی رہنما شبلی فراز ، اعظم سواتی، فیصل جاوید، سینیٹر سیف اللہ نیازی، عامر کیانی و دیگر بھی کمرہ عدالت میں موجود تھے۔
سماعت کے آغاز پر جج رخشندہ شاہین نے ریمارکس دیے کہ صرف ایک وکیل اور پٹیشنر کورٹ میں رہے، باقی باہر چلے جائیں،اس رش میں کیس نہیں سن سکتے، اس موقع پر عدالت نے کمرے میں میڈیا کوریج پر پابندی عائد کرتے ہوئے صحافیوں کو کمرہ عدالت سے باہر جانے کا حکم دے دیا۔
دوران سماعت عمران خان کی جانب سے طبی بنیادوں پر آج حاضری سے استثنیٰ کی درخواست دائر کردی گئی ، عدالت نے سماعت میں وقفہ کردیا، جس کے بعد دوبارہ آغاز ہواتو عمران خان کے وکیل نے کہا کہ جو بھی بات کہوں گا اس کے میڈیکل رپورٹ کی صورت میں ثبوت موجود ہیں، جج نے ریمارکس دیے کہ آپ نے میرا گزشتہ سماعت کا آرڈر ہائی کورٹ میں چیلنج کررکھا ہے، جس پر وکیل نے کہا کہ اگر آپ میری درخواست سن کر ریلیف دے دیں تو ہائی کورٹ نہیں جاو¿ں گا۔
جج نے کہا آپ نے میرا آرڈر چیلنج کررکھا ہے، اس لیے ضرور جائیں،عمران خان کے وکیل بیرسٹر سلمان صفدر نے ویڈیو لنک کے ذریعے عمران خان کی حاضری سے متعلق دلائل دیے، وکیل نے کہا کہ میں چاہتا ہوں آپ اوپن مائنڈ کے ساتھ ہمیں یہاں سن لیں، جسٹس قاضی فائز عیسیٰ کا فیصلہ موجود ہے، سپیشل پراسیکیوٹر نہیں آسکتا، میں نے اس کے باجود رضوان عباسی پر اعتراض نہیں اٹھایا، میں آج بھی ان پر اعتراض نہیں اٹھاو¿ں گا۔

اس خبر پر اپنی رائے کا اظہار کریں

اپنا تبصرہ بھیجیں