پاکستان ٹائم کے مطابق وزارت خزانہ حکام کی جانب سے آئی ایم ایف کو میمورنڈم آف اکنامک اینڈ فنانشل پالیسی (ایم ای ایف پی) کا مسودہ بھجوا دیا گیا ہے. کل تک آئی ایم ایف اس حوالے سے وزارت خزانہ کو دوبارہ جواب دے گا۔
پاکستان ٹائم کے مطابق آئی ایم ایف وزارت خزانہ کی جانب سے موصول ہونے والے میمورنڈم آف اکنامک اینڈ فنانشل پالیسی مسودے کا ریویو لے گا جس کے بعد ریویو شدہ مسودہ وزارت خزانہ کو واپس بھیجا جائے گا. اطلاعات کے مطابق حکومت نے آئی ایم ایف کو راضی کرنے کے لئے مسودے میں سیلز ٹیکس بڑھانے کے متعلق تفصیلات لکھی ہیں. حکومت کی جانب سے یہ اصولی فیصلہ کیا گیا ہے کہ مختلف کیٹگریز میں سیلز ٹیکس بڑھایا جائے گا.
اس حوالے سے وزارت خزانہ نے بتایا کہ رواں ہفتے کے دوران آئی ایم ایف سے اہم پیش رفت ہونے کا قوی امکان ہے. 170 ارب روپے کے منی بجٹ کے لئے آرڈیننس لانے کا فیصلہ بھی جلد کیا جائے گا. وفاقی کابینہ کے اجلاس میں سیلز ٹیکس بڑھانے کے متعلق بات چیت ہوگی جس میں منی بجٹ کے خدوخال اور آرڈیننس پر قانونی نکات کو بھی دیکھا جائے گا.
