مسلم لیگ ن کی سینئر نائب صدر مریم نواز نے الزام عائد کیا ہے کہ عدلیہ عمران خان کو اب بھی سہولت فراہم کر رہی ہے جبکہ مسلم لیگ ن کے رہنماوں سے امتیازی سلوک برتا جاتا ہے۔
نجی ٹی وی ڈان نیوز کے مطابق مریم نواز کا میڈیا سے گفتگو کے دوران کہنا تھا کہ عمران خان ٹیریان وائٹ، ممنوعہ فنڈنگ اور توشہ خانہ کے تحائف سے متعلق جواب نہیں دے رہے۔ اس کے مقابلے میں، میں اور میرے والد نواز شریف کرپشن کیسز کی 200 سے زائد سماعتوں میں عدالت پیش ہو چکے ہیں۔
انہوں نے کہا کہ عمران خان کے خلاف کرپشن اور اختیارات کے ناجائز استعمال میں ملوث ہونے کے دعووں کے باوجود حکومت ان کو گرفتار کیوں نہیں کر رہی۔ اس بات کے ثبوت دستیاب ہونے کے باوجود کہ عمران خان کے ہاتھ کرپشن سے داغدار ہیں، وہ عدالتوں میں پیش نہیں ہو رہے اور بار بار انہیں اگلی تاریخیں دے دی جاتی ہیں، عدلیہ عمران خان کو اب بھی سہولت فراہم کر رہی ہے اور اس سے سوالات اٹھ رہے ہیں۔
