اسلام آباد(وقائع نگار خصوصی)وفاقی وزیر داخلہ اور پاکستان مسلم لیگ ن کے مرکزی رہنما رانا ثنا اللہ خان نے انکشاف کیا ہے کہ اگر عمران خان 25 مئی کو دھمکی نہ دیتا تو ہم نے مستعفی ہو کر الیکشن کرانے کا فیصلہ کر لیا تھا۔
’پاکستان ٹائم “ کے مطابق میڈیا سے گفتگو کرتے ہوئے رانا ثناء اللہ خان کا کہنا تھا کہ فری اینڈ فئیر الیکشن کرانے کی ذمہ داری الیکشن کمیشن کی ہے،اگر الیکشن ہوں گے تو انشاللہ ہم تیار ہیں،حالیہ فیصلے سے پاکستان ڈیمو کریٹک موومنٹ (پی ڈی ایم) حکومت یا ن لیگ کا کوئی سروکار نہیں۔رانا ثنا اللہ نے کہا کہ گورنر خیبرپختونخوا نے جو خط لکھا وہ ان کی ایک رائے ہے،ہم الیکشن میں حصہ لینے کیلئے بطور سیاسی جماعت تیار ہیں تاہم انہوں نے خبردار کرتے ہوئے کہا کہ الگ الگ الیکشن ہوئے تو اس سے سیاسی انتشار بڑھے گا،ہماری رائے ہے کہ الیکشن ایک ساتھ ہوں تو صاف شفاف ہوں گے۔وفاقی وزیر داخلہ نے کہا کہ جنرل(ر) قمر جاویدباجوہ کے ساتھ مسلم لیگ ن کی کوئی ڈیل نہیں ہوئی تھی،مسلم لیگ ن کسی سمجھوتے میں شامل نہیں تھی،ایسی کوئی بات نہیں کہ ہمیں حکومت 28 نومبر کے بعد ملی،عوام میں اس بیانے کے ساتھ جائیں گے کہ عمرانی ٹولے نے نواز حکومت گرائی،موجودہ معاشی مشکلات اس لیے ہیں کہ عمرانی ٹولہ غلط فیصلے کر کے گیا۔
