اسلام آباد (کامرس رپورٹر) مہنگائی کی چکی میں پسی عوام کیلئے ایک اور بری خبر سامنے آئی ہے، حکومت اور آئی ایم ایف کے درمیان سرکلرڈیٹ مینجمنٹ پلان پر اتفاق ہو گیا ہے، جس کے تحت بجلی مرحلہ وار 7 روپے 91 پیسے فی یونٹ مہنگی کی جائے گی ۔
”پاکستان ٹائم “کے مطابق پاکستان نے آئی ایم ایف کو نومبر 2023 تک بجلی سہ ماہی بنیادوں پر مہنگی کرنے کا پلان دیدیا ہے، فروری تا مارچ تک پہلی سہ ماہی میں 3.21 روپے فی یونٹ مہنگی کی جائے گی، مارچ تامئی دوسری سہ ماہی میں بجلی مزید 0.69 روپے فی یونٹ مہنگی ہو گی، جون تا اگست تیسری سہ ماہی میں بجلی کے ریٹ مزید 1.64 روپے فی یونٹ بڑھائے جائیں گے، ستمبر تا نومبر چوتھی سہ ماہی میں بجلی کے فی یونٹ ریٹ میں 1.98 روپے کا اضافہ ہو گا۔
سامنے آنے والی دستاویزات کے مطابق حکومت کسان پیکج کے تحت بجلی کی سبسڈی یکم مار چ سے ختم کرنے جا رہی ہے، کسان پیکیج کے تحت سبسڈی ختم کرنے سے 65 ارب روپے کی بچت ہو گی، آئی ایم ایف نے بجلی کی تقسیم کار کمپنیوں کیلئے وصولیوں کا ہدف90.4 فیصد مقررر کر دیا ہے ، آئی ایم ایف نے بجلی کے تکنیکی نقصانات میں 16.2 ارب روپے کمی کی شرط عائد کر دی ہے، آئی ایم ایف سے بجلی کی تقسیم کار کمپنیوں کی ریکوری میں 0.58 فیصد بہتری پر اتفاق کیا گیا ہے، مارچ تک نومبر فیول چارج ایڈجسٹمنٹ کی مد میں صارفین سے مزید 35 ارب روپے جمع کیے جائیںگے، 14 ارب روپے سیلز ٹیکس کی مد جمع ہوں گے۔
