استنبول(مانیٹرنگ ڈیسک)ترکیہ کے جنوب اور شمالی شام میں 7.8 شدت کا شدید زلزلے نے تباہی مچا دی ،دونوں جگہ آنے والے زلزلے سے تقریبا 500افراد جاں بحق اور سینکڑوں زخمی ہو گئے ہیں ،
غیر ملکی میڈیا کے مطابق شام کی وزارت صحت نے بتایا کہ شام کے حکومت کے زیر قبضہ علاقوں میں 7.8 شدت کے زلزلے کے بعد کم از کم 245 افراد ہلاک ہو گئے جس کا مرکز جنوب مشرقی ترکی میں تھا،حلب،لطاکیہ،حما اور طرطوس کے صوبوں میں 237 افراد ہلاک اور 629 افراد زخمی ہوئے ہیں۔ترک حامی دھڑوں کے زیر کنٹرول شمالی علاقوں میں کم از کم 8 افراد ہلاک ہوئے ہیں،شام میں اموات کی کل تعداد 245 ہو گئی ہے۔ڈیزاسٹر منیجمنٹ ایجنسی اے ایف اے ڈی کے مطابق ملک کے جنوب میں کئی صوبوں میں آنے والے شدید زلزلے میں 76 افراد ہلاک اور 440 زخمی ہو گئے۔اڈانا، ادیامان، ملاتیا،کہرامانماراس، گازیانٹیپ میں ہمارے 76 شہری جان سے ہاتھ دھو بیٹھے ہیں جبکہ سنلیورفا،دیارباکر، اداانہ، ادیامان،ملاتیا،عثمانیہ،ہتے اور کلیس میں 440 شہری زخمی ہوئے ہیں۔امریکی جیولوجیکل سروے نے بتایا کہ جنوب مشرقی ترکی میں 7.8 شدت کا ایک شدید زلزلہ آیا،جس سے کئی شہروں میں عمارتیں زمین بوس ہو گئیں جبکہ پڑوسی ملک شام میں بھی نقصان پہنچا۔امریکی ایجنسی کے مطابق زلزلہ مقامی وقت کے مطابق صبح 4 بج کر 17 منٹ پر تقریباً 17.9 کلومیٹر کی گہرائی میں آیا،جس کے 15 منٹ بعد 6.7 شدت کا آفٹر شاک بھی آیا۔
ترکیہ کے ڈیزاسٹر اینڈ ایمرجنسی منیجمنٹ پریزڈنسی (اے ایف اے ڈی) نے پہلے زلزلے کی شدت 7.4 رپورٹ کی۔ترک ٹیلی ویژن اور سوشل میڈیا پر آنے والی تصاویر میں ریسیکو اہلکاروں کو کہرامنماراس اور ہمسایہ شہر غازیانتپ میں عمارتوں کے ملبے کو کھودتے ہوئے دکھایا گیا ہے۔ترکیہ کے صدر رجب طیب اردون نے سماجی رابطے کے ویب سائٹ ٹوئٹر پر اپنے پیغام میں کہا کہ تمام شہری جو زلزلے سے متاثر ہوئے ہیں ان کے لیے نیک خواہشات کا اظہار کرتا ہوں۔ان کا کہنا تھا کہ امید کرتے ہیں کہ ہم جلد از جلد اور کم سے کم نقصان کے ساتھ مل کر اس آفت سے نکل جائیں گے۔رپورٹ کے مطابق زلزلے اس وقت آیا جب زیادہ تر لوگ اب بھی گھروں میں سو رہے تھے، جس کی وجہ سے ہلاکتیں بڑھنے کا خدشہ ہے۔ہولناک زلزلے سے ادیامان اور ملاتیا شہروں میں بھی عمارتوں کو نقصان پہنچا اور درجنوں گھر زمین بوس ہو گئے،زلزلے کے جھٹکے وسطی ترکی اور دارالحکومت انقرہ کے کچھ حصوں میں بھی محسوس کیے گئے۔دوسری جانب وزیراعظم محمد شہباز شریف نے ترکیہ میں شدید زلزلے سے ہونے والے نقصانات پر رنج وغم کا اظہار کیا اور اپنے تعزیتی بیان میں حکومت اور عوام سے قیمتی جانوں کے ضیاع پر تعزیت کا اظہارکرتے ہوئے متاثرہ خاندانوں سے ہمدردی کا اظہار کیا، وزیراعظم نے جاں بحق افراد کی مغفرت اور زخمیوں کی جلد صحت یابی کےلئے دعا کی۔ان کا کہنا تھا کہ پاکستانی حکومت اور عوام مشکل کی اس گھڑی میں برادر ملک ترکیہ کی حکومت اور عوام کے ساتھ ہیں،ترکیہ نے ہر مشکل میں ہمیشہ پاکستان کا ساتھ دیا ہے، پاکستان اپنے برادر ملک ترکیہ کے عوام اور حکومت کی ہر ممکن مدد کرے گا۔وزیراعظم نے کہا کہ قدرتی آفات اور موسمیاتی تبدیلیوں سے تباہی کے بڑھتے واقعات پوری دنیا کے لیے خطرے کی گھنٹی ہے، یہ انسانیت اور کرہ ارض کی بقا کا معاملہ ہے۔