ایرانی سپریم لیڈر کا ہزاروں قیدیوں کو عام معافی دینے کااعلان


تہران (مانیٹرنگ ڈیسک)ایران کے سپریم لیڈر آیت اللہ علی خامنائی نے حال ہی میں حکومت مخالف مظاہروں میں گرفتار کیے گئے افراد سمیت ملک کی جیلوں میں قید ہزاروں افراد کو عام معافی دینے کا اعلان کردیا۔
غیرملکی میڈیا کے مطابق ایرانی سپریم لیڈرآیت اللہ خامنائی نے1979کے انقلاب ایران کی سالگرہ کی خوشی میں ملک کی تمام جیلوں میں قید ہزاروں قیدیوں کے لئے عام معافی کا اعلان کردیا ہے ، اس عام معافی کا اطلاق ایران میں دوہری شہریت کے حامل قیدیوں پر نہیں ہو گا، زمین پر کرپشن میں ملوث افراد پر بھی اس معافی کا اطلاق نہیں ہو گا جہاں اس جرم میں ملوث چار افراد کو حال ہی میں سزائے موت بھی دی جا چکی ہے،اس کے علاوہ غیرملکی خفیہ ایجنسیوں یا ایران کے مفادات کے خلاف کام کرنے والے عناصر کے لیے کام کرنے والوں پر بھی اس معافی کا اطلاق نہیں ہو گا۔
یاد رہے کہ ستمبر میں پولیس کے ہاتھوں دوران حراست ک±رد خاتون مہسا امینی کی ہلاکت کے بعد سے ایران میں احتجاج کا سلسلہ جاری ہے جہاں ان مظاہروں میں تمام شعبہ ہائے زندگی سے تعلق رکھنے والے افراد نے شرکت کی اور یہ ایران کی حکومت کے بعد 1979 کے انقلاب کے بعد سب سے بڑا چیلنج بن گئے تھے۔مقامی سماجی تنظیم کے مطابق اس دوران احتجاج اور مظاہروں میں شرکت اور اس سے تعلق کے الزام میں ملک بھر سے 20ہزار سے زائد افراد کو حراست میں لیا گیا جن کو حکام نے ایران کو بھڑکانے والے غیرملکی دشمن قرار دیا۔انسانی حقوق کی تنظیموں کا کہنا ہے کہ اس دوران احتجاج میں 70 بچوں سمیت 500 سے زائد افراد مارے گئے جبکہ چار افراد کو سزائے موت دی گئی البتہ مظاہروں سے تعلق کے شبے میں چند افراد کو پھانسی دیے جانے کے بعد سے اس احتجاج کی شدت میں نمایاں کمی آئی ہے۔عدالت کے سربراہ غلام حسین محسنی نے سپریم لیڈر کو جیلوں میں قید افراد کو معافی دینے کے لیے لکھے گئے خط میں تحریر کیا کہ حالیہ واقعات کے دوران متعدد افراد بالخصوص نوجوانوں نے دشمنوں کے پروپیگنڈے کے نتیجے میں غلط اقدامات یا جرائم کیے تاہم اب دشمنوں کے ان عزائم کو ناکام بنائے جانے کے بعد متعدد نوجوان اپنے کیے پر نادم ہیں، اس معافی کا اطلاق غیرملکی ایجنسیوں کے لیے جاسوسی کے الزامات کا سامنا کرنے والوں پر نہیں ہو گا جبکہ غیرملکی ایجنٹوں سے رابطے رکھنے، جان بوجھ کر قتل کرنے اور سرکاری املاک کو نقصان پہنچانے والوں کو بھی معافی نہیں دی جائے گی۔عدلیہ کے نائب سربراہ صادق رحیمی نے کہا کہ جن لوگوں نے اپنے کیے پر ندامت کا اظہار نہیں اور دوبارہ ایسی سرگرمیوں میں ملوث ہونے کے حوالے سے تحریری ضمانت نہیں دی، انہیں بھی معاف نہیں کیا جائے گا۔

اس خبر پر اپنی رائے کا اظہار کریں

اپنا تبصرہ بھیجیں