ملتان (وقائع نگار)سابق وزیر خارجہ اور پاکستان تحریک انصاف (پی ٹی آئی) کے وائس چیئرمین شاہ محمود قریشی نے پاکستانی قوم پر بجلیاں گراتے ہوئے دعویٰ کیا ہے کہحکومت پٹرول کو مزید 50 روپے مہنگا کرنے پر آمادہ ہو چکی ہے جبکہ بجلی 7 روپے فی یونٹ مہنگی کرکے لوگوں پر مزید بوجھ ڈالا جائے گا۔
مریم نواز کے دورہ ملتان پر کڑی تنقید کرتے ہوئے شاہ محمود قریشی کا کہنا تھا کہ مریم نواز بتائیں کس منہ سے ملتان کا دورہ کررہی ہیں؟ آپ کی حکومت آئی ایم ایف سے گفتگو و شنید کررہی ہے،آپ کی حکومت پٹرول کو مزید 50 روپے مہنگا کرنے پر آمادہ ہو چکی ہے،بجلی 7 روپے فی یونٹ مہنگی کرکے لوگوں پر مزید بوجھ ڈالا جائے گا۔شاہ محمود قریشی نے کہاکہ کیا مریم نواز ملتان کیلئے یہ تحفہ لے کر آئی ہیں ؟کیا یہ خوشخبری لائی ہیں؟ آٹا مزید مہنگا ہونے والا ہے ،بجلی مزید مہنگی ہونے والی ہے ،مریم نواز نے یہ کیوں نہیں بتایا؟انہوں نے کہاکہ امپورٹڈ حکومت سیلز ٹیکس بھی مزید 18 فیصد بڑھانے جارہی ہے،آئی ایم ایف کے کہنے پر گیس کی قیمتیں بھی بڑھانے جا رہے ہیں ،مریم نواز بتائیں کس منہ سے ملتان کا دورہ کررہی ہیں؟۔
