اسلام آباد(سٹاف رپورٹر)الیکشن کمیشن نے کراچی اور حیدر آباد میں بلدیاتی انتخابات کل اتوار کو ہی کرانے کا اعلان کر دیا۔
ترجمان الیکشن کمیشن کے مطابق کراچی اور حیدر آباد ڈویژن میں کل بلدیاتی انتخابات ملتوی نہیں ہوں گے جبکہ کراچی اور حیدرآباد ڈویژن میں بلدیاتی انتخابات کے لیے سخت سیکیورٹی یقینی بنانے کی ہدایت کر دی گئی ہے۔سندھ الیکشنر کمشنر اعجاز انور نے کہا کہ سندھ کے تمام اضلاع میں الیکشن سامان کی ترسیل کا عمل شام 4 بجےتک مکمل ہو جائے گا جبکہ کراچی اور حیدر آباد ڈویژن میں کل بلدیاتی انتخابات ملتوی نہیں ہوں گے۔
الیکشن کمیشن کے دوٹوک فیصلے پر مسرت کا اظہار کرتے ہوئے امیر جماعت اسلامی کراچی حافظ نعیم الرحمان نے کہا کہ عوام کو مبارکباد دیتا ہوں۔ حکومت اور اتحادی اب نوشتہ دیوار پڑھ لیں جبکہ کون کتنا پاپولر ہے یہ فیصلہ کل عوام کو کرنے دیں۔عوام تذبذب کا شکار نہ ہوں کل ووٹ ڈالنے کا حق استعمال کریں،سازش کرنے والوں کو علم ہونا چاہیے کہ کوئی ساتھ نہیں دے رہا اور کوئی آرڈیننس قابل قبول نہیں ہو گا بلکہ کل الیکشن ہوگا۔دوسری طرف پاکستان پیپلز پارٹی کے رہنما اور صوبائی وزیر سندھ شرجیل انعام میمن نے کہا کہ پیپلز پارٹی بلدیاتی الیکشن کے لیے پہلے بھی تیار تھی تاہم ہمیں الیکشن کمیشن کے تحریری فیصلے کا انتظار ہے اس کے بعد ہی کچھ کہہ سکیں گے۔
