کراچی(بزنس ڈیسک)سال ۲۰۲۳ اپنے اختتام کو پہنچ رہا ہے ، کئی اچھی بری یادیں بھی سمیٹے ہوئے ہے اور اس سال ملک میں سونے کی قیمت 35 ہزار 900 روپے اضافہ دیکھا گیا ، عالمی سطح پر بھی فی اونس سونے کی قیمت میں 264 ڈالر کا اضافہ دیکھاگیا تھا۔ تفصیلات کے مطابق 2023ء میں مقامی صرافہ مارکیٹوں میں فی تولہ سونے کی قیمت مجموعی طور پر 35900روپے کے اضافے سے 220000روپے اور فی 10 گرام سونے کی قیمت 30779روپے کے اضافے سے 188615روپے ہوگئی۔سونے کی مقامی قیمتوں میں اضافے کی بنیادی وجوہات میں ملک کو درپیش زرمبادلہ کے بحران، اسمگلنگ کے بڑھتے ہوئے رحجان اور معیشت کی سنگین صورتحال کی وجہ سے غیریقینی کیفیت شامل رہی۔ سال 2023 کے دوران 10اکتوبر کو سونے کی کم ترین عالمی قیمت 1822ڈالر فی اونس اور مقامی فی تولہ قیمت 188400روپے رہی جب کہ 28دسمبر کو سونے کی بلند ترین عالمی قیمت 2105ڈالر فی اونس اور مقامی فی تولہ قیمت 222800روپے ریکارڈ کی گئی تھی۔
