اسلام آباد: (ویب ڈیسک) پاکستانی معیشت کیلئے اچھی خبر آگئی۔ قرض بحالی پروگرام کےلیے بین الاقوامی مالیاتی فنڈ کے شرائط کے پیش نظر دوست ملکوں سے 3 ارب ڈالر کی فنانسنگ میں اہم پیشرفت ہوئی جبکہ سعودی عرب نے 2 ارب کی فنڈنگ کا گرین سگنل دے دیا۔
‘پاکستان ٹائم’ کے مطابق دوست ممالک کی جانب سے 3 ارب ڈالر کی فنانسنگ میں اہم پیش رفت سامنے آئی۔ ذرائع وزارت خزانہ نے بتایا کہ سعودی عرب نے 2 ارب کی فنڈنگ کا گرین سگنل دے دیا۔ وزیر خزانہ 10 اپریل کو امریکا جانے سے پہلے یواے ای قیادت سے رابطہ کریں گے۔ وزیر خزانہ اسحاق ڈار رواں ماہ واشنگٹن جائیں گے۔ دوسری جانب آئی ایم ایف شرح سود میں مہنگائی کے حساب سے مزید اضافہ کے مطالبے پر قائم ہے جبکہ سالانہ 900 ارب روپے کی سبسڈی پر تاحال اعتراض ہے۔ آئی ایم ایف پٹرولیم لیوی کی مد میں 850 ارب روپے جمع کرنے کے مطالبے پر قائم ہے۔ وزارت خزانہ ذرائع کا کہنا ہے کہ آئی ایم ایف پٹرول اور ڈیزل کی امپورٹ کم کرنے کا مطالبہ کررہا ہے، آئی ایم ایف نےپٹرولیم لیوی اورٹیکسز کا شارٹ فال پورا کرنے کا مطالبہ کیا ہے۔
