اسلام آباد ( مانیٹرنگ ڈیسک)وزیر اعظم محمد شہباز شریف نے آزاد کشمیر کی موجودہ صورتحال پر گہری تشویش کا اظہار کرتے ہوئے تمام فریقین پر زور دیا ہے کہ وہ اپنے مطالبات کے حل کے لئے پرامن لائحہ عمل اختیار کریں۔
سماجی رابطوں کی ویب سائٹ ایکس پر وزیر اعظم نے پیغام میں کہا کہ بحث و مباحثہ اور پرامن احتجاج جمہوریت کی خوبصورتی ہیں لیکن قانون کو اپنے ہاتھ میں لینے اور سرکاری املاک کو نقصان پہنچانے کو برداشت نہیں کیا جا سکتا۔انہوں نے کہا کہ بدقسمتی سے افراتفری اور اختلاف رائے کے صورتحال میں ہمیشہ بعض لوگ ایسے ہوتے ہیں جو فوری سیاسی پوائنٹ سکورنگ شروع کر دیتے ہیں۔شہباز شریف کا کہنا تھا کہ وزیر اعظم آزاد کشمیر سے بھی بات کی اور خطے میں مسلم لیگ (ن)کے تمام عہدیداروں کو ہدایت کی کہ وہ ایکشن کمیٹی کے رہنمائوں کے ساتھ مل کر پرامن حل تلاش کریں۔ انہوں نے کہا کہ مخالفین کی کوششوں کے باوجود امید ہے یہ معاملہ جلد حل ہوجائے گا۔
