خیبرپختونخوا (وقائع نگار)خیبرپختونخوا کے نامزد وزیرا علیٰ علی امین گنڈا پور نے کہا ہے کہ گڈ گورننس کے ذریعے خود کو ثابت کریں گے ، اپنے ویڑن کے مطابق عوامی بجٹ دیں گے۔
”پاکستان ٹائم “کے مطابق ایک انٹرویو میں انہوں نے کہا کہ ارکان اسمبلی کے حلف لینے کے بعد بانی پی ٹی آئی سے وزراءکے ناموں کی حتمی منظوری لی جائے گی۔نامزد وزیر اعلیٰ نے کہا کہ حالیہ الیکشن جیتنے والے پی ٹی آئی کے 55 فیصد نئے ارکان اسمبلی میں پہنچے ہیں اور ان انتخابات نے پارٹی کے ساتھ مخلص رہنے والوں اور مفاد پرستوں کی شناخت کرائی۔علی امین گنڈاپورکا کہنا تھا کہ بانی پی ٹی آئی نے پہلے بھی اپنی مرضی سے ایسی ٹیم کا انتخاب کیا تھا جو ورلڈکپ جیت چکی تھی اس بار بھی کارکردگی کی بنیاد پر بانی پی ٹی آئی ارکان کو ذمہ داریاں دیں گے۔انہوں نے مزید کہا کہ صوبے میں امن و امان کے قیام، صحت کارڈ کی بحالی اور تعلیمی نظام کی بہتری پر توجہ دیں گے، ہم اپنے پلان کوعملی طور پر لاگو کرکے دوربارہ میدان میں اتریں گے۔
