اسلام آباد (سٹاف رپورٹر)پاکستان مسلم لیگ ن کے سینئر رہنما محمد زبیر بھی وکٹری سپیچ پر حیران رہ گئے اور کہاکہ حقیقت بالکل مختلف ہے، لیڈنگ پارٹی پی ٹی آئی ہے، 75سیٹوں پر وکٹری سپیچ کرنا عجیب سی بات ہے۔ نجی ٹی وی چینل سے گفتگو کرتے ہوئے محمد زبیر نے پاکستان تحریک انصاف اس بار ایک نئی تحریک انصاف ابھر کر سامنے آئی ہے، بلا لیے جانے سے مشکلات میں اضافہ ضرور ہوا لیکن جو پی ٹی آئی دیوار سے لگی ہوئی تھی اس نے پھر بھی ہمیں ہرا دیا، 16مہینے کی حکومت ہمیں نہیں لینی چاہیے تھی، میاں نواز شریف کو ٹھیک بات نہیں بتائی گئی، قائد ن لیگ چاہتے تھے تحریک عدم اعتماد کے بعد الیکشن میں جائیں۔ ایک سوال کے جواب میں ان کاکہناتھاکہ جب پی ٹی آئی کا لانگ مارچ فیل ہو گیا تھا تو اسمبلی تحلیل کر دیتے تو بہتر ہوتا اور جب آئی ایم ایف پروگرام بحال ہو گیا تھا تب بھی حکومت ختم کی جا سکتی تھی، شہبازشریف پر سب سے زیادہ ذمہ داری عائد ہوتی ہے، وہ کہتے تھے سب ملکر حکومت چلائیں ،ایسا دنیا میں کہیں نہیں ہوتا، صدر مسلم لیگ ن کا نظریہ نواز شریف سے بالکل مختلف ہے،75سیٹوں پر وکٹری اسپیچ کرنا عجیب سی بات ہے، مجھے نہیں پتہ کہ کس نے نوازشریف کو اسپیچ دینے کی ایڈوائس کی۔
