پشاور(عدالتی رپورٹر ) پشاور ہائی کورٹ نے پاکستان تحریک انصاف کی رہنما شاندانہ گلزار کو گرفتار نہ کرنے کے احکامات جاری کردیے ہیں ، ساتھ ہی صوبائی حکومت سے درخواست گزارہ کے خلاف درج مقدمات کی تفصیل بھی طلب کرلی۔ تفصیلات کے مطابق پشاور ہائی کورٹ میں جسٹس سید ارشد علی اور جسٹس وقار احمد پر مشتمل دو رکنی بینچ کے روبروپی ٹی آئی کے وکیل نے بتایا کہ شاندانہ گلزار این اے 30 سے الیکشن میں حصہ لے رہی ہیں اور انہیں انتخابی مہم کے دوران گرفتار کیے جانے کا خدشہ ہے، استدعا کی کہ درخواست گزارہ کے خلاف جتنے بھی مقدمات ہیں ان کی تفصیل فراہم کی جائے اور پولیس کو بھی شاندانہ گلزار کے خلاف کارروائی کرنے سے روکا جائے۔
