لاہور (سٹاف رپورٹر) پاکستان تحریک انصاف کے انتخابی نشان کا معاملہ واضح نہ ہونے پر رہنمائوں نے پاکستا ن تحریک انصاف نظریاتی کے ٹکٹ جمع کرادیئے جس پر پی ٹی آئی نظریاتی کے سربراہ اختراقبال ڈار نے ہنگامی پریس کانفرنس کی اور ٹکٹوں کے جعلی ہونے کا دعویٰ کردیا۔ لاہور پریس کلب کے نثار آڈیٹوریم میں ہنگامی پریس کانفرنس سے خطاب کرتے ہوئے انہوں نے کہاکہ مجھے نہیں پتہ کہ پی ٹی آئی امیدواروں نے ہماری ٹکٹیں کہاں سے لیں، پی ٹی آئی نے ہمارے جعلی ٹکٹ جمع کرائے ہیں، پی ٹی آئی نظریاتی کے امیدواروں کو ٹکٹ میں نے خود جاری کیے ہیں،پی ٹی آئی نظریاتی کا اپنا منشور، اپنا آئین ہے، ہمارا نعرہ کرپشن کی سزا موت ہے۔ ان کامزید کہنا تھاکہ کسی پارٹی کا امیدوار دوسری پارٹی کا پلیٹ فارم استعمال نہیں کرسکتا، الیکشن کمیشن کا کام ہے جنہوں نے جعلسازی کی ،انہیں پکڑے۔
