نیو یارک(فارن ڈیسک)سابق امریکی صدر ڈونلڈ ٹرمپ نے عدالت میں کھڑے ہو کر جج کو ہی ڈانٹ دیا جس پر فاضل جج نے وکیل کو تنبیہ کرتے ہوئے کہا کہ اپنے موکل کو سنبھالو۔ امریکی میڈیا کے مطابق ٹرمپ کے خلاف کاروباری اثاثوں کی زائد مالیت بتا کر بینکوں اور بیمہ کنندگان کو دھوکا دینے کا الزام ہے جس پرنیویارک کے اٹارنی جنرل نے ٹرمپ پر کم از کم 370ملین ڈالر جرمانہ کرنے اور ان کے بیٹوں کے نیویارک میں کاروبار پر مستقل پابندی لگانے کی درخواست کی ہے۔ جج آرتھر نے ٹرمپ کے وکیل کو سننے کے بعد سابق صدر کو اضافی مگر مختصر بیان کی اجازت دی تو ساتھ ہی کہا کہ وہ کمرہ عدالت کا احترام کریں،جج کی جانب سے خبردار کیے جانے کے باوجود ٹرمپ نے کہا کہ پراسیکیوٹرز کی کوشش ہے کہ انہیں دوبارہ صدر بننے سے روکیں اور اگر وہ اس پر بات نہیں کرسکتے تو یہ ٹھیک نہیں ہوگا،جج نے مداخلت کی کوشش کی تو ٹرمپ نے انہیں بھی جھڑک دیا اور کہا کہ تمھارا بھی اپنا ایجنڈہ ہے، تم ایک منٹ سے زیادہ سن نہیں سکتے جس پر جج نے ٹرمپ کے وکیل کو تنبیہ کی کہ اپنے موکل کو قابو میں رکھو۔
