اسلام آباد(بیورو رپورٹ) فیڈرل بورڈ آف ریونیو(ایف بی آر) نے سمگل شدہ اشیاء اور گاڑیاں پکڑوانے میں کسٹمز حکام کی معاونت کرنے والوں کو انعام دینے کا فیصلہ کیا ہے،اس مقصد کے لیے فیڈرل بورڈ آف ریونیو نے کسٹمز ریوارڈ رولز 2012 میں ترامیم کا مسودہ تیار کر کے سٹیک ہولڈرز کی آراء کے لیے جاری کر دیا ہے۔
”پاکستان ٹائم“کے مطابق مجوزہ مسودے میں بتایا گیا ہے کہ کسٹمزکے ساتھ ساتھ لاءانفورسمنٹ ایجنسیوں اور انٹیلی جنس ایجنسیوں کے حکام کے علاوہ جو بھی سمگل شدہ اشیا اور گاڑیاں پکڑوانے میں کسٹمز حکام کی معاونت کرے گا، اس معاونت کے نتیجے میں ضبط کی جانے والی اشیا اور گاڑیوں پر ڈیوٹی و ٹیکس کی رقم کی ریکوری پر معاونت کرنے والوں کو انعام فراہم کیا جائے گا۔ایف بی آر کی طرف سے تمام سٹیک ہولڈرز سے کہا گیا ہے کہ کسٹمز رولز میں ترامیم کے مسودے کے بارے میں سات دن کے اندر اندر اپنی آرا بھجوا سکتے ہیں۔مقررہ میعاد کے بعد موصول ہونیوالی آرا و تجاویز اور اعتراضات کو قبول نہیں کیا جائے گا اور گزٹ نوٹیفکیشن کے ذریعے ان ترمیمی رولز کے اطلاق کا نوٹیفکیشن جاری کر دیا جائے گا۔
