اسلام آباد(سٹاف رپورٹر)دنیا کے طاقتور ترین پاسپورٹس کی فہرست جاری کردی گئی ہے جس کے مطابق طاقتور ترین پاسپورٹس کی فہرست میں متحدہ عرب امارات(یو اے ای)کا نام سرفہرست رہا،اس کا پاسپورٹ رکھنے والے افراد ویزا لیے بغیر 180ممالک کا سفر کرسکتے ہیں،یو اے ای کے بعد جرمنی، سپین، فرانس، اٹلی اور نیدرلینڈز مشترکہ طور پر دوسرے نمبر پر رہےجہاں کے شہریوں کو 178ممالک میں جانے کے لیے ویزے کی ضرورت نہیںہے ۔ آرٹن کیپیٹل کی جانب سے جاری رینکنگ کے مطابق سوئیڈن، فن لینڈ، لگسمبرگ، آسٹریا اور سوئٹزر لینڈ کے پاسپورٹس کے حصے میں تیسرا نمبر آیا جن کے حامل افراد 177ممالک کا سفر ویزے کے بغیر کرسکتے ہیں،ڈنمارک، بیلجیئم، پرتگال، پولینڈ، آئرلینڈ اور جنوبی کوریا کے پاسپورٹس پر 176ممالک کا سفر ویزے کے بغیر کرنا ممکن ہے اور یہ فہرست میں مشترکہ طور پر چوتھے نمبر پر ہیں۔ اس فہرست میں پاکستان کمزور ترین پاسپورٹ رکھنے والا 5واں ملک قرار پایا جو مجموعی طور پر 94ویں نمبر پر موجود ہے،پاکستانی پاسپورٹ پر 47ممالک میں ویزا فری سفر یا ویزا آن ارائیول کی سہولت دستیاب ہے۔
