اسلام آباد(کورٹ رپورٹر ) آفیشل سیکرٹ ایکٹ کی خصوصی عدالت نے سائفر کیس میں سابق وفاقی وزیر اسد عمر کی درخواست ضمانت قبل از گرفتاری منظور کر لی۔
یہ بھی پڑھیں : پیپلز پارٹی کا لطیف کھوسہ کو شوکاز نوٹس
جج ابو الحسنات ذوالقرنین نے ایف آئی اے پراسیکیوٹر کے بیان کی روشنی میں ضمانت منظور کی۔اسد عمر کو 50 ہزار روپے کے ضمانتی مچلکے جمع کروانے کی ہدایت کی گئی۔وفاقی تحقیقاتی ادارے(ایف آئی اے)کے پراسیکیوٹر شاہ خاور ایڈوکیٹ نے عدالت میں اہم بیان دیتے ہوئے کہا کہ اس وقت اسد عمر کی گرفتاری درکار نہیں ہے کیونکہ ابھی تک ان کے خلاف شواہد نہیں لیکن دوران تفتیش شواہد سامنے آئے تو دیکھیں گے۔اسد عمر کو ایف آئی آر میں نامزد نہیں کیا گیا، عدالت میرا بیان لکھ لے۔اسد عمر کے وکیل ڈاکٹر بابر اعوان نے کہا کہ شاہ خاور سے کہیں کہ عدالتی کارروائی میں مداخلت نہ کریں۔شاہ خاور ایڈوکیٹ نے کہا کہ مستقبل میں اگر کوئی شواہد سامنے آئے تو اسد عمر کو آگاہ کریں گے۔ آفیشل سیکرٹ ایکٹ عدالت میں چیئرمین پی ٹی آئی،شاہ محمود قریشی اور اسدعمر کے خلاف سائفر کیس کی سماعت کی گئی۔
