ہانگ کانگ(مانیٹرنگ ڈیسک)ہانگ کانگ اور جنوبی چین میں ریکارڈ توڑ بارشوں نے نظام زندگی درہم برہم کردیا۔
برطانوی میڈیا کے مطابق ہانگ کانگ میں شدید بارشوں سے رہائشی علاقے زیر آب آگئے، سیلاب کی وجہ سے سڑکیں بہہ گئیں اور ٹرینوں سمیت ٹرانسپورٹ کا نظام بھی درہم برہم ہوگیا، ہانگ کانگ میں سیلابی صورتحال کی وجہ سے سکول، دفاتر اور کاروبار کو بھی بند کردیا گیا ہے۔محکمہ موسمیات کا کہنا ہے کہ ہانگ کانگ میں جمعرات کو ایک گھنٹے میں 70ملی میٹر بارش ریکارڈ کی گئی جس نے تقریبا 140سالوں کا ریکارڈ توڑا ہے،انتظامیہ کی جناب سے بتایا گیا ہے کہ مختلف علاقوں میں سیلاب میں پھنسے لوگوں کو نکالنے کیلئے ریسکیو عمل بھی جاری ہے اور گزشتہ 24گھنٹوں میں 83لوگوں کو اسپتال منتقل کیا گیا ہے جب کہ لینڈ سلائیڈنگ سے زمینی راستے بھی منقطع ہوگئے ہیں،
یہ بھی پڑھیں:سعودی عرب جی 20ممالک میں تیز ترین ترقی کرنیوالی معیشت قرار
دوسری جانب ہانگ کانگ کی سرحد سے لگنے والے جنوبی چین کے شہر شینزین کو بھی شدید بارشوں اور سیلابی صورتحال کا سامنا ہے جب کہ انتظامیہ نے سیلاب کی وجہ سے نشیبی علاقوں میں بسنے والوں کو گھروں سے نہ نکلنے کی بھی ہدایت کی ہے،میڈیا رپورٹس کے مطابق خراب موسم کی سبب صوبے گوانگ ڈونگ میں سیکڑوں پروازوں کو معطل کردیا گیا، شہر میں ہونے والی اس بارش کو 1952کے بعد سے اب تک کی بدترین بارش قرار دیا گیا ہے،میڈیا رپورٹس میں کہا گیا ہے کہ شینزین اپنے ذخائر سے اضافی پانی چھوڑنے کی تیار کررہا ہے جس پر ہانگ کانگ نے خبردار کرتے ہوئے کہا کہ اضافی پانی چھوڑنے سے ہانگ کانگ کے شمالی علاقوں میں بھی سیلاب آجائے گا،چینی محکمہ موسمیات نے ملک کے جنوب مغربی علاقوں میں جمعہ اور ہفتے کے روز مزید شدید بارشوں کی پیش گوئی کی ہے۔
